Shillong, Nohprah 07: Ka Jaintia Rural Tourism Society hynne ka sngi ka sngi kala pynbna ban pynlong daka Tamasa iaput iatem lane ka ‘Southern Slopes Music Concert 2022’ haka 10 tarik mynta u bnai hapoh kawei ka jaka shangkai pyrthei ha Loomkyntoor Resort kaba don hapoh ka shnong Skhen Pyrsit kaba hap hapoh ka Amlarem Civil Sub division.
Haba kren sha ki lad pathai khubor u President ka Jaiñtia Rural Tourism Society bah Teibor Toi Hing u la iathuh ba ka thong ban pynlong iaka ‘Southern Slopes Music Concert 2022’ kadei naka bynta ban kyntiew iaka kam jngohkai pyrthei hapoh ka rilum Jaintia baroh kawei.
U bah Teibor u la iathuh ba naduh ba shah khang ban tih dewiong, ki paidbah ka thain East bad West Jaintia hill kila phai khmat shaka kam jngohkai pyrthei naka bynta ban ioh kamai kajih ban pyndap ha ïng hasem.
U la ong ba ki paidbah ka thain East bad West Jaintia Hill khamtam ki khun samla kila sdang ban phai khmat shaka kam jngohkai pyrthei daka ba tei iaki Guest House, ki Home Stay bad ban pynitynnad iaki jaka shangkai pyrthei naka bynta ban khring iaki paidbah.
“Ha kane ka ‘Southern Slopes Music Concert 2022’ ki kynhun tem na bar ka ri India kynthup na United States of America (USA), United Kingdom bad kiwei ki kynhun tem napoh ka jylla kum ka DewDrops, Rum And Monkeys, Seis Euphony, Imprints bad ka Nexus kin wan pynshongshit ia ki paidbah haka 10 tarik mynta u bnai” la ong u bah Teibor.
