Shillong, Naiwieng 24 : Ka seng Hynniewtrep Integrated Territorial Organization (HITO) hynne ka sngi palei, kala pynbna ban pynlong da ka jingiaid paidbah ha Nongbah Shillong ban pynpaw ia ka jingpyrshah kaba jur ia ki kam thombor ka Assam kaba lam sha ka jingshah siat iap ki 5 ngut ki riew paidbah ha Mukroh, West Jaintia Hills.
U President ka HITO Bah Donbok Dkhar haba iakren bad ki lad pathai khubor, ula pyntip ba kane ka jingiaid paidbah kan long ha ka 26 tarik Naiwieng bad kan sdang na Madan Iewrynghep sha Assam House, Dhankheti.
Une u Nongialam ka HITO ula iawer ruh ia ki paidbah ka Jylla ban wan iashimbynta ha kane ka jingiaid paidbah bad ban iadon bynta ruh ha ka jingthang mombiti kum ka dak ban kynmaw burom ia ki 5 ngut kiba khlad na ka jingshah ther kuli ha ki Pulit Assam ha Mukroh.
“Ia 26 tarik mynta u bnai yn tip kum ka ‘Red Flag Day’ ban pyni iaka jingpyrshah halor ka jingleh donbor ka sorkar Assam iaki paidbah ba sah ha ki thain khappud lyngba ka tnat Pulit” ong u bah Donbok.
Ha kajuh ka por, ka HITO kala kynnoh ia u Myntri Rangbah ka Jylla Conrad K Sangma halor kane ka jingjia ha Mukroh da kaba ong ba ka Sorkar Jylla ha ka jingshisha kala dei ban buh ia ka Police Outpost naduh mynno ha Mukroh ban ai jingshngain ia ki paidbah nongshongshnong.
“Ka Seng bad ki paidbah ka Mukroh kila dawa ia ka ktem Pulit naduh ki snem bala leit noh hynrei haduh mynta ka Sorkar kam shym la shimkhia eiei” ula ong.
U la ong ba kane ka jingnud jong ki Pulit Assam ban tur shaduh u pud u sam ka Meghalaya, ka pyni iaka jingtlot ka sorkar Meghalaya khamtam ka tnat Pulit.
