Dimapur, Nailur 27 :Ka Eastern Naga Students Federation (ENSF) ka la pynbna da ka jingiamareh paidbah ne “mass public walkathon movement” ha ka 7 tarik u bnai Risaw 2022, kata kaba dei ka jingshim rai jong ka Eastern Nagaland Peoples’ Organisation (ENPO) na ka bynta ban kiar ban iashim bynta ha kino kino ki ilekshon ha ka jylla ne ka ri tad haduh ba ka jingdawa ka jong ki na ka bynta la ka jong ka jylla ‘Frontier Nagaland’ kan wan urlong.
Ia kane ka jingiamareh yn pynlong ha baroh ki headquarter kiba hap hapoh ka Eastern Nagaland kiba kynthup ia ki hynriew tylli ki district jong ka Tuensang, Mon, Longleng, Noklak, Kiphire bad Shamator.
Ka ENSF kala shim ia kane ka rai ha ka jingialang kaba kyrkieh ba la pynlong ha kine ki khyndiat sngi ba la dep hapoh ka shnong Anatongre kaba hap hapoh Shamator district.
Hadien ka jingiamir jingmut kaba la jlan bha ha kaba iadei bad ka jingshim rai jong ka ENPO ha ka 26 tarik u bnai Nailar ba la dep, na ka liang ka federation ha ryngkat ki hynniew tylli ki unit kila shim ia ki sienjam na ka bynta ban pynlong ia ka jingiakhih ha ka kylla kaba nyngkong.
Kine ki hynniew tylli ki unit jong ka federation ki kynthup ia ka ENSF—Chang Wedoshi Setshang, Konyak Students Union, Khiamniungan Students’ Union, Phom Students’ Conference, Tikhir Student’ Union, United Sangtam Students’ Conference bad ka Yimkhiung Akherü Arihako kila shah pynkhamti na ka bynta ban pynkhreh ha la ki jong ki thain na ka bynta kane ka jingiakhih, ong ka ENSF.
“Ha kaba kum kane ka por kaba kongsan bha ha kaba iadei bad kane ka jingdawa ia ka jylla Frontier Nagaland, lada ki don kino kino ki kynhun seng ne ki riew shimet kiba bat ia ki kam kiba halor kiba don ia ka bor ban pynthut ia kane ka jingangnud ban ioh la ka jong ka jylla Frontier Nagaland, na ka liang ka federation kan shim ia ki sienjam kiba tyngeh pyrshah ia ki,” ong shuh shuh ka jingthoh ba la pyllait da ka kynhun.
Ha kawei pat ka bynta, na ka liang ka United Sangtam Likhüm Pümji (USLP)kala pynpaw ia ka jingai jingkyrshan kaba pura ia kane ka nongrim kaba ka ENPO ka ieng na ka bynta ban dawa ia ka jylla Frontier Nagaland.
