Shillong, Nohprah 02 : Ka bor District ka East Jaintia Hills, kala pynbna ban pakhang ia ka surok National Highway-06 na Lumshong sha Malidor naduh lashai ka sngi-ka 3 tarik Nohprah namar ba dang iaid ka jingshna pynbha, maramot ia kane ka bynta jong ka surok.
Kat kum ka jingpynbna ba la pynmih da u Deputy Commissioner, la khang ia ki kali naduh ki kali kiba rit haduh ki kali kiba heh ba kin iaid lyngba kane ka bynta jong ka surok (Lumshnong-Malidor) hapdeng ka por 9 baje mynstep haduh 3 baje janmiet manla ka sngi.
U Deputy Commissioner ula bthah ia baroh ki nongleit nongwan ba kin da pynbeit bha noh ia ka leit ka wan jong ki bad ban pyllang ia ki marbam mardih ba donkam katba dang khang ia kane ka surok.
Ula ong ba kane ka jingpakhang ia ka surok ka long kaba donkam namar ki kam kiba kyrkieh, ban pynthikna ia ka jingshngain bad jingskhem jong ka surok nalor ban lah pyndep ia ka kam hapoh ka por.
Ula ong ba wat ia ki trai shnong ruh, yn ym shah satia ban iaid ban ieng na kane ka surok ha kane ka por lait noh tang ha ki khep kibym lah ban kiar kata ruh bala mynjur da ki bor ba dei khmih ia ka iaid ka ieng ki kali.
U DC ula ong ba tang ki kali Emergency yn shah ban iaid ha kane ka bynta jong ka surok ba la khang iaid kali.
