Shillong, Kyllalyngkot 20: U Nongialam ka Liang Pyrshah na ka Congress Bah Ronnie V Lyngdoh ula pynbna ba u Nongialam ka seng Congress Rahul Gandhi un wan pynlong ia ka ‘Bharat Jodo Nyay Yatra’ ha ka 22 tarik u Kyllalyngkot ha Ri Bhoi District.
U Bah Ronnie V Lyngdoh ula ong ba u Rahul Gandhi yn sdang ia ka jingiaid ia katei ka Yatra na DTO office Nongpoh shaduh sha madan Pahamsyiem bad yn sa pynlong pat ia ka jingialang paidbah ha katei ka madan.
Ula ong ruh ba u Rahul Gandhi yn sah shi miet ha Byrnihat bad ha ka sngi kaba bud yn don ha ka jingialang ha USTM bad ka NEC.
U Bah Ronnie V Lyngdoh ula ong ba ym dei ban sngewthuh bakla iaka Bharat Jodo Nyay Yatra kum ka jingialap elekshon, hynrei kadei ban pynshai bad ban pynsngewthuh paidbah halor kiba bun ki mat naduh ka jingkiew dor ki marbam bad ki mar ki mata, ka jingkyrduh kam kyrduh jam, ka jingthombor iaka riti synshar ka ri, ka jingpyndonkam bakla ia ka CBI, IT, ED pyrshah ia ki dkhot kiba don ha ka liang pyrshah.
Ula ong ba ka Bharat Jodo Nyay Yatra ka long ban kyrsiew thiah ia ki paid nongshong shnong ka ri India, halor ka jingpyndonkam ia ka bor bad ka jingleh donbor da ka sorkar NDA.
“Lada don kano kano ka jingpyrshah bad nga tharai ba lada phi peit iaka ‘statistic’ ym shim la don uwei ruh u Myntri ne MP ne MLA kiba shah ktah na kane ka jingbeh ksuid ka BJP kaba phah da ka CBI, IT, ED bad kitei ki nongialam khamtam lada kidei kiba pawnam bha bad ki ioh ia ka jingkyrshan na ki paidbah, kumta ka BJP kan pynthikna ba kan leh eiei pyrshah ia ki khnang ba kan pynthud ia ka kam kaba ki trei, kan pynthud ia ka jingiadei ka jongki bad ki paidbah” ula ong.
“Phi iohi ha Manipur, lada u Myntri Rangbahduh ka ri u lah ban leit shang sha kylleng ki ri, balei ym shim la lah pat ban leit jurip ia ka Manipur, Balei ym shim la ai kano kano ka jingtyrwabad ki paidbah baroh kila shah ktah jur la kidei na ka jaidbynriew kaba rit ne kaba heh paid ne kidei ki riewlum” la ong u nongialam ka Congress bad ka ong, “Lada u leit, la kumno kumno ruh yn ioh ban don lem ia ka jingsngew, ka jingpang hynrei da kaba shu sngap jar, nga tharai kan pynshlur shuh shuh ia kito ki bor namar haduh mynta ka Manipur ka dang thnam bha”.
U Bah Lyngdoh ula ong ba ka Bharat Jodo Nyay Yatra ka long ka jingai ia ka hok bad ka Congress ka kwah ban pynthikna ba kan don ka jingai ia ka hok ha ka ri bad ki briew kiba don ha ka bor kim dei ban pyndonkam bakla satia ia ka bor ka jong ki.
