Shillong, Nohprah 09: U Myntri Rangbah ka Jylla u Conrad K Sangma hynne ka sngi Baar, ula pynbna ba ka sorkar jylla kala pynsuk ia ki kam ban pynbeit ryntih noh ia ki jaka kiba aiwai (Lease) da ka sorkar.
“Ngi lah shim ia ka rai mynta ka sngi ban pynbeit ryntih ia ki jaka kiba bun kiba la ai wai da ka sorkar. Kumba phi tip, ki don bun bah ki jaka sorkar ha sor Shillong kaba la ai wai mynta lah bun snem bad kala don ruh ka jingpynthymmai man la ka 30 snem bad ha katei ka jingpyniaid ia ka kam, ki kot ki sla ki hap ban iaid lyngba ka sorkar” la ong u Sangma haba iakren bad ki nongthoh khubor hadien ba la wai ka jingialang jong ka Kynhun Myntri.
U Myntri Rangbah ula batai, ba ka jingpyniaid ia ki kam ka long kaba kyllain bad kaba jrong, kaba donkam ia ka jingdon byntalang jong kiba bun ki ophisar.
Ban shimkhia ia kane ka sorkar kala rai ban pynkhamti ia ka bor ha ki Deputy Commissioner, ban ailad ia ki ba kin shim ia ka rai bad ban pynthymmai ia ka jingai wai kaban long ha ka lynti kaban kloi bha.
“Kumta ngi lah pynsuk ia ka rukom treikam bad kiba bun ki bynta bad ka bor la pynkhamti ha ki Deputy Commissioner, khnang ba ki Deputy Commissioner kin lah ban shim ia ka rai bad ban leh ia ki jingpynthymmai ha ka lynti kaba kloi khlem da donkam shuh ban wan sha ka sorkar,” la ong u Sangma.
 da ka sorkar.){kind=link}