Pynbah khlieh ka Raid Marwet ha u President ka HNYM lada mih jingiakynad pher Jaidbynriew

Nongpoh, Naitung 04: U Syiem ka Raid Marwet Ken Syiem, ula tynrong ia ka jingbahkhlieh ha u President ka seng HNYM Bah Louis Dohtdong, lada mih kano kano ka jingiakynad pher Jaidbynriew hapdeng ki paid Khasi bad ki Garo hapoh ka Raid.

“U President ka HNYM un hap shim ia ka jingkitkhlieh lada mih kano kano ka jingiakynad pher jaidbynriew hapoh ka Raid namar ka jingioh long Rangbah Shnong ki Garo” ong u Paiem haba bynrap “Kane ka jingleh u Bah Louis ka lah ban aiding bad pynmih ia ka jingsngew iapher jaidbynriew kumba jia ha Manipur. Lada jia eiei, un hap ban shim ia ka jingkitkhlieh”.

Une u Khlieh Nongsynshar ka Raid Marwet ula ther tyngeh ruh ia ka jingkren u President ka HNYM ha ki lad pathai khubor ba kynnoh ba u Syiem ka Raid ula donkti ban die tuh ia ki jaka puta ka Raid sha ki bar Jylla bad ba ailad ia ki Garo ban long Rangbah Shnong.

“Ki jingkynnoh jong une u Nongialam Sengbhalang ki dei ki bym nongrim hynrei kaba lah pynban ban wanrah ia ka jingsngew iapher Jaidbynriew hapdeng ki Garo bad ki nongshongshnong ka Raid” ula ong.

Kat kum ka jingong jong u, ka kam ba iadei bad ka jinglong Rangbah Shnong ki Garo ka dei kaba la dep ban pynbeit da ka Ophis u Syiem ka Hima Mylliem bad ka KHADC.
Halor ka jingkynnoh die jaka, u Syiem ka Raid ula kynthoh tyngeh da kaba ong “ U Bah

Louis Dohtdong um donkam ban wan leh contractor da kaba wanrah ia ka jingpynsngewthuh bakla hapdeng ki khun ki hajar ka raid. Ki kot ki sla ba u pyni ha ki lad pathai khubor ki dei kiba naduh u snem 2004 ha kaba um pat shimti satia kum u Syiem ka Raid. Nalor kata, ki kot ki sla bala ai da ka Dorbar Raid sha ki Bar Jylla ka dei tang ia kito kiba shong ba sah hapoh ka Raid naduh u snem 1965”.

U Syiem ka Raid ula kren da kaba shai kdar ba une u Nongialam ka HNYM u dei ban da wad bniah shuwa ia baroh ki jing shisha shuwa ba un kren sha ki paidbah haba ong “Ka long biej ban shu kren laplah khlem da don ha ka nongrim kaba skhem ne kaba shai”.

Pule ruh: Thma pyrshah droks : Thung ka Sorkar ia ka Advisory Board ban pyntreikam pura ia ka PIT NDPS Act