Shillong, Nailar 26 : Kawei ka Khynnah skul ba 17 snem, kala shah lute T.300 da ka jingpynap tari ha ki riew runar hajan ka Aprilia showroom, kaba don ha Lumiablot, Nongthymmai.
Kane ka jingjia kala jia ha ka janmiet sngi Nyngkong, ong ka khubor ki Pulit.
Ki iathuh ba kane ka khynnah ba kyrteng ka Shellyza Dkhar, kaba pule ha skul Auxilium, Nongthymmai, ka dang wan phai na skul ha ka por 2:33 baje janmiet ha ka por ba jia kane ka jingjia. Kat kum ka ejahar bala ujor da ka Kmie kong Iarilang Dkhar, ki runar bala iarap da 3 ngut kiba donkti lang, kila khynra ia ka pla skul bad ka pla sopti shuwa ban shim ia ka pisa.
Ia kane ka khynnah la ialam noh sha Civil Hospital, Shillong, ban leh medical examination bad la pyllait noh hadien ba khmih bniah da ki doktor. Ki Pulit kila register ia ka case bad kila leit sha katei ka jaka bad ki dang bishar ia ki video CCTV n aka thain ban lapdien ia kine ki runar.
Ha kawei pat ka jingjia, u Wansawlang Lyngdoh ula ujor ha ka sngi Nyngkong ba pyntip ba ki runar kila tuh ia ka taiar kali jong u ha ka 22 tarik Nailar kumba 3:45 baje mynstep. Ula pyntip ruh ba kum kane ka jingshah tuh kala jia ruh ia kiwei ki kali kiba dei jong ki para marjan kiba pynieng ha kajuh ka parking lot.
Ki Pulit kila register case ia kane ka jingjia bad ki dang tohkit ban lapdien ia ki briew kiba donkti.
