Nongpoh, Nailar 25 : Ka kynhun ki runar ba don kumba 10 ngut, kila leit rung jubor ha ka iingsah jong uwei u Hehspah ha 13 mer, Jorabat, Assam bad lute ia baroh ki jingdon jingem hadien ka jingpynap suloi ia ki trai iing.
Kane ka jingjia kala jia ha ka step sngi U Blei ha ka por 2 baje eiei, ong ki Pulit kiba iathuh ba une u Hehspah u dei uba ju shalan mawit.
Ki Pulit ki iathuh ba kine ki runar kila leit rung ruh ha ka Ophis treikam une u hehspah bad rong lut ia baroh ka pisa bad ka ksiar ka ksah kaba poi da ki lak tyngka.
Kat kum ka jingbatai u manager bad nongap pahara, kine ki runar kila rung nyngkong ha ka Ophis treikam une u hehspah ba kyrteng u Deepal Hazarika da kaba pynap suloi ia u manager bad ia u nongap pahara. Kine ki runar kila the ia ki kti bad sop ia ka shyntur kine ki arngut hashuwa ba kyndang ia ki almari ba buh pisa.
Hadien kane, kine ki runar kila leit rung sa sha iing sah u Hazarika kaba don shadien ka Ophis bad hangne kila thombor ia ki briew kiba don ha iing bad hadien kila kyndang ia baroh ki almari bad rong lut ia ka ksiar ka ksah hashuwa ba kin phet krad.
Ki Pulit haba ioh jingtip ia kane, kila hiar wut wut sha kane ka Iing ban tohkit. Ia kane ka jingjia la register case ha Sonapur Police Station bad ka jingtohkit mynta kala iaid shakhmat.
