Shillong, K’lyngkot 20 : Kum ka jingpyrshang kaba tyngeh ban pynlong ia ka New Shillong kabbalah ban kyrda ia ka jingkylla ka suinbneng, ka Sorkar Jylla ka la pyntreikam ia ka project thungdieng ban pynkylla ia kane ka sor ban sa mih thymmai kum kawei na ki jaka sorb a jyrngam tam ha ka thain.
Hapoh kane ka project, bala sdang pyniaid ha u snem 2025, ka Sorkar ka thmu ban thung haduh 6,000 tylli ki dieng ha rud ki surok ba jrong palat 25 km bad 2 km ka jaka, da kaba kynshew haduh T.2.5 klur ha kine ki san snem ban wan.
Ki Heh Sorkar ki iathuh ba kane ka sienjam ka dei kaba la pynwandur ha kaban pynthikna ba ka jingiaid sted ki kam pynroi ha ki jaka sor kin ym ktah ia ka sawdong sawkun ka mariang.
Ka jingthungkam kan iaid naduh ki lynti iaid ba kongsan ha New Shillong Township, kynthup ka Lad Ummir-ka lynti Mawkhanu, ha kaba haduh 10,000 tynrai ki dieng lah buh thong ban thung, ia kaba haduh 6,340 tynrai lah dep ban thung mynta harud jong ka surok kaba la iaid 16.56 km.
Ym kumba long kiwei ki jingpynitynnad ba ju leh man ka por, kane ka project kan long kum ka lynti ban wanrah ia ka jing jyrngam. Kat kum ki kot ki sla bala pynkhreh da ka Sorkar, kane ka jingthung dieng lah khmih lynti ba kan pynduna ia ka jingjaboh ka lyer, pynduna ia ka jingshit kyrang ka sngi, tehlakam ia ka jingshah rong ka khyndew bad pynthikna ia ka jing shngain ki surok.
“Kane ka lynti ban pynjyrngam kan pynlong ia ka New Shillong kum ka sor kaba iaid ryngkat ryngkat ha ka jingkiew shakhmat bad ka jingpynbiang tarajur bad ka mariang” ong ki kot ki sla ka Sorkar.
Ka jingiashimbynta lang jong ki shnong ki thaw ruh lah wanrah lang ha kane ka plan, ha kaba yn pyniadon bynta iaki shnong ki thaw ha ka jingthungdieng, jingai jinghikai bad ka jingsumar ia ki dieng ia kaba la khmih lynti ba kan aikam aijam bad pynthikna ba kan iai neh.
