Shillong, Lber 20: Ka seng United Democratic Party (UDP) hynne ka sngi kala pynpaw ia ka jingdonkam ba baroh ki seng riewlum kin iatylli noh naka bynta ban pynkhlain iaka synshar khaddar khamtam hapoh ka Khasi-Jaiñtia Hills.
Haba kren sha ki lad pathai khubor u General Secretary ka UDP u bah Jemino Mawthoh ula ong ba naduh u snem 1997 haduh mynta mynne ka UDP kala iakhun ban wanrah ia ka jingiatylli hapdeng ki seng riewlum hapoh Meghalaya.
“Ka UDP lane ki nongialam ka UDP kim ju kynthoh pyrshah ia kiwei ki seng riewlum kum iaka HSPDP, ka PDF, ka VPP ne iaka KHNAM namar ka sngew ba baroh ki donkam ban iatylli ban pynkhlain tang kawei ka seng riewlum ban wanrah ka synshar khaddar kaba khlain khamtam hapoh rilum Khasi-Jaintia” la ong u bah Jemino.
U bah Jemino ula ong ba kala donkam iaki nongialam jong kiwei ki seng riewlum ban kylla kaba mut kata ban iatylli ban long kawei bad kane kan urlong haka jingialam ka UDP kaba dei ka Party trai ri kaba heh tam bad kaba rim tam hapoh ka jylla Meghalaya.
Ula ong ba ka jingpait ki party kam dei tang hapdeng ki seng riewlum hynrei ia kane la sakhi ruh wat hapdeng ki National Party kiba don hapoh ka jylla Meghalaya.
Shuh shuh u bah Jemino ula ong ba lada ki seng riewlum ki ieng ban iatylli, kan wanrah ka jingkhlain jong u kyrtong u ban iakhun ha ka ilekshon MP sha Lok Sabha 2024.
Kala don ka jingiakren ba ka UDP ka lah ban pynieng ia u bah Jemino Mawthoh kum u kyrtong haka ilekshon MP sha Lok Sabha ha u 2024 hynrei ia kane ka rai yn shim hi da ka Party ha ki sngi ban wan.
