Shillong, K’Lyngkot 13: U myntri ka tnat ka koit ka khiah James K Sangma hynne ka sngi u la pyllait paidbah ïa phone nomber Helpline 14410 kum shi bynta ban pyntreikam ia ka prokram ‘Mental Health’ na ka bynta kino kino kiba donkam jingïarap.
Ia une u Number Helpline 14410 jong ka prokram ‘Mental Health’ la pyllait kum shibynta jong ka Meghalaya Mental Health and Social Care Policy kaba la pyllait paidbah ha u bnai Naiwieng 2022.
Ïa une u Number Helpline 14410, yn pynïaid da kynhun jong ki 50 ngut ki Counselor na ki district bapher bapher naduh 16 tarik mynta u bnai bad une u Helpline Number un treikam naduh ka sngi nyngkong haduh ka sngi thohdieng naduh ka por 10 baje mynstep haduh 5 baje janmiet.
Naka bynta ban pynsuk iaki paidbah ka jylla Meghalaya, ki paidbah ki lah ban phone ha une u Number Helpline bad ki lah ban jied ïa ka ktien kaba ki kwah ban ïakren kata ha ka ktien Khasi, Garo, Pnar, Hindi lane English.
Haba phone ha une u Number Helpline, ki paidbah kiba donkam jingiarap ki lah ban ioh iakren bad ki Psychiatrist, ki Social Worker, ki Nurse bad ki Psychologist katkum ka jingdonkam jong ki bad lada don kiba donkam ka jingïarap kaba markhmat, yn phah ïa ki sha ki jaka sumar kum ha ki Primary ne ki Tertiary Healthcare Centre.
Da ka ba pyllait paidbah ia Number Helpline 14410 jong ka prokram ‘Mental Health’, ka jylla Meghalaya ka long ka jylla kaba nyngkong eh hapoh ka thain Shathei Lam Mihngi (North East) bad kaba lai hapoh ka Ri India ban don ïa ka Mental Health and Social Care Policy.
Ia kane la leh naka bynta ban pynthikna ban ai ka jingshakri kaba biang na ka bynta ban ïoh ïa ka koit ka khiah ha ka jingmut jingpyrkhat (Mental Health).
La pyllait paidbah ïa kane ka “helpline” da ka jingthmu ban pynïasoh lang shen bad ka TELE MANAS Network jong ka Ri India baroh kawei.
