Shillong, K’lyngkot 10 : U Myntri ka Sorkar India ba khmih iaka Tnad Fisheries, Animal Husbandry & Dairying u Parthottam Rupala, hynne ka sngi ba-ar, ula pyllait paidbah ia ka Mobile Veterinary Unit (MVU) ha ka jingialang bala pynlong ha Mahendraganj, South West Garo Hills.
Kine ki Mobile Unit ki dei kiba la wanrah da u Myntri Rangbah ka Jylla Narendra Modi ban iarap ia ki nongri jingri jong ka thain ba kin sumar ia ki jingri jingdup, ong u Myntri haba kren ha ka jingialang bala pynlong da ka Tnad Animal Husbandry & Veterinary.
“Ngi la ai 17 tylli ki MVU ia ka Jylla Meghalaya. 90% na ka jinglut yn bei da ka Sorkar India. Ha ka jylla baroh kawei, kane ka jingshakri ki MVU kan poi ha man ki thliew iing jong ki nongri jingri. Kaba donkam ka long tang ban shu phone ha u 1962 bad ka MVU kan sa wan poi ha khyrdop iing” ong u Myntri.
Kawei pa kawei ka MVU ka wan ha ryngkat ki tiar ki tar ba donkam ban sumar ia ki jingri jingdup bad kan don ruh uwei/kawei ka doktor, ki paramedical staff bad u nongniah.
Da ka jingdon ki MVU, ki Nongtrei ka tnad Animal Husbandry & Veterinary kin lah ban leit ai injek bad ban ai jingsumar ia kiba bun ki jingpang jong ki jingri jingdup, ula bynrap.
Hadien kane, u Myntri ula pyllait ia ki MVU ha Garabadha hashuwa ba un mih na South West Garo Hills.
U Rupala ula iaroh ruh ia ka jingtrei shitom jong ki Ophisar ka Jylla halor ka jinglah ban pyniaid ia ki kam pynroi sha ki shnong ki thaw.
Ula kren ia kane haba phai sha ka tnad Fisheries da ka jingnang kiew ka jingpynmih dohkha hapoh ka Disrrict bad bynrap baka Jylla kan sa lah ban pyndap ia ka jingdonkam dohkha. Ula pynpaw ruh ba ka thain ka dei kaba biang eh ruh ban ri ia ki syiar bad ban pynmih dud.
“Nga la leit jngoh ia ka Dairy Farm hajan Tura. Ka dei kaba la rim bha. Ka por kala kylla bad la donkam ban pynheh bad shna bha ia ka” ula ong.
U Rupala ula ong ruh ba ki Shnong Khappud ki dei kiba la shimkhia bha hapoh ka jingialam jong u Myntri Rangbah Duh. “Ki Myntri Sorkar kila shah bthah ban leit iuhkjat sha ki jaka khappud bad ban iakren bad ki paid khappud” ula ong haba bynrap b aka jingleit iuhkjat ha khappud bad ban sngap ia ki jingdonkam bad ki jingeh ka dei kaba la buh hakhmat eh da ka Sorkar India.
Ha ka sngi ba-ar jong ka jingwan iuhkjat ha South West Garo Hills, u Myntri ula leit ruh ban jngoh ia ki project bapher bapher ha kylleng ki jaka jong ka District.
Ula let ruh ban iuhkjat ha ka iew khappud ha Kalaichar bad jurip ia ka jingker sainar shiah ha ki jaka khappud ba 38 km bad ka Bangladesh. Ula iakren ruh bad ki shipai BSF, ki Ophisar ka Tnad Border Area Development bad ki dkhot ka Border Haat Committee kiba la pynsngew ia ka jingbym biang ki jaka leit bar bad ki jingtei na ka bynta ki nongkhaii ha kane ka iew.
U Rupala ula iapbiej ruh halor ka jinglah ban pynitynnad ia ka Aqua Park ha Jolgaon da ki nongri dohkha bad ka Taljawa Lake ha Kumligain, kiba la shna da ka jingiarap song pisa naka skhim ka Sorkar Pdeng bad ka Sorkar Jylla. Shuwa kane, ula leit ruh ban iuhkjat ha Kamakhya Temple ha Thakuranbari bad ioh iakren ia ki trai shnong, ki SHG bad kiwei kiwei nalor ka jingleit iuhkjat ha ka shnong Manabari bad Kodaldhowa jong ka District.
