Shillong Nailur 02: Ka jingkynshew pisa jong ka Sorkar Meghalaya ban pynlong ia ki tamasa bapher bapher ha kaba ka jylla kala pynioh nong haduh T.133.43 Klur ha u snem ba la dep.
Ia kane la pyntip da u Myntri ka tnad Jngohkai u Bah Paul Lyngdoh ha ka jingpyllait paidbah ia ka Meghalaya’s Autumn Calendar 2025 da ka jingthmu ban kyntiew ia ka kam jngohkai.
“Ka jylla kala bei tyngka T.23.50 na ka bynta ki tamasa bapher bapher ha u snem ba la dep, kaba kynthup ia ka Me-gong Festival, Shillong Cherry Blossom Festival, Literary Festival bad kiwei kiwei. Ka jingioh nong na katei ka jingbei ka la long T.133.42 Klur” ong u Bah Paul haba iakren bad ki nongthoh khubor”.
U Bah Lyngdoh ula pyntip ba ia ka Shillong Cherry Blossom Festival, yn pynlong ha ka 14 bad 15 tarik u Naiwieng mynta u snem bad kane ka tamasa kala lah ban pynioh kamai bha ha u snem ba la dep, ha kaba ka sorkar jylla kala bei T.5 Klur bad kala iohnong haduh T. 59.98 Klur.
Katkum ka jingong ka jongu, mynta u snem, ka jingbei tyngka kan kot sha ka T.4 Klur.
“Mynta ka kynti ia ka Shillong Cherry Blossom Festival yn pynlong ha Shillong ha JN Stadium. Khnang ba yn ailad ia ki briew kiba wan nabar ba kin iaid ha kylleng ki jaka jong ka nongbah ban leit sha ka surok kaban poi sha madan Polo ban iashimbynta ha katei ka tamasa kaba 2 sngi. Nalor kata kin don ruh ki dukan bad ki jingpyninam ki bapher bapher ha ki lynti iaid ban poi sha ka Stadium” la ong u Myntri Sorkar.
Ka Shillong Cherry Blossom Festival kala pynkhreh ban pynshongshit lyngba ki nongrwai bad ka kynhun tem kaba pawnam ha ka sngi kaba nyngkong kaban kynthup ia u Jason Derulo, Nora Fatehi bad The Script.
U Bah Paul ula ong ba ka Nora Fatehi, kadei ruh kaba la pawnam bha bad kaba la pynshongshit ruh ia ki paidbah ha ka FIFA World Cup kaba la long ha Qatar ha u snem 2022 bad kan dei ka sien kaba nyngkong eh ia ka ban wan pynshongshit ha ka tamasa kaban long hapoh ka ri India.
Nalor kane u Bah Paul ula pynbna ba katkum ka calendar ne ki Tarik ban pynlong ia kiwei pat ki tamasa ha ka jylla ki kynthup ia ka Meghalaya Kayak Festival 14-18 tarik u Risaw, ka 7th Ahor 4×4 Offroad Challenge 23-25 tarik u Risaw, ka Shillong Literary Festival 20-22 u Naiwieng, ka Me-gong Festival ha ka 28-29 tarik u Naiwieng bad ka Winter Tales ha ka 11-13 tarik u Nohprah.
Nalor kane ula pyntip ruh ia ka jingpyrshang ka sorkar ban kyntiew ia ka sap jong ki trai jylla lyngba ka CMJMP programme kaba long man la ka sngi, kaba kynthup haduh 7,000 ngut ki nongrwai.
“Bun ki kynhun bad ki nongtem ka jylla, kiba la leit ban pyni ia la sap shabar jong ka jylla mynta kila wan ban pyni iala ka jingtbit hapoh ka jylla Meghalaya bad wat sha kiwei kiwei ki ri. Kin don ruh katto katne ki nongrwai bad nongtem kin leit ban pynbyrngia ha Singapore ha u bnai ban wan” ula ong.
U Bah Lyngdoh ula pyntip ruh ba ka sorkar ka dang pynleit jingmut ha kaban kyntiew ia ki jingtei kiba iadei bad ka kam jngohkai bad ban pyniasoh ia ki shnong lyngba ki Tourism Circuit.
Ka Tourism policy ka don ia ka thong ban kyntiew ia kane ka kam ha ki liang bapher bapher. Ka jingbei tyngka na ka bynta ka 5-Star ha Umiam bad Sohra kadei kaba la khmih lynti ba kan khring ia ki nongjngohkai kiba don bae m bad ba kan kyntiew ia ka ioh ka kot.
“Hapoh jong ki 3 snem ban wan, ngi dei ban lah ban iohi ba kitei ki jingbei tyngka kiba kongsan ha kaban pynbiang ia ki jaka sah. Mynta ngin don sa 2 tylli ki 5 Star ha Umiam bad 2 tylli ha Sohra. Ngin don ruh ia ka Rain Museum kaban tei ha Mawsynram, Mawmluh Experiential Cave, baroh kine kin iarap ha kaban kyntiew shuh shuh ia ka jingshem jong ki nongjngohkai kiba wankai sha Meghalaya,” ula ong.
Katkum ka jingong ka jongu, ka Sohra ka don palat 500 tylli ki Homestay bad bun ki longiing kila ioh jingmyntoi bha.
“Nga kwah ban pynshai haba ngi pynlong ia ki tamasa, bun ki briew ki ong ba ngi kiba duk bad ngim kot bor, hynrei kine kidei ki jingbei tyngka kiba la bei lyngba ki nongjngohkai kiba wan sha Meghalaya khnang ba kan kyntiew ia ka ioh ka kot jong ka jylla khnang ba ngin lah ban bei tyngka ha kitei ki bynta kiba kongsan ia kaba ngi dang sahdien bha” la bynrap u Bah Paul Lyngdoh.
