Shillong, Jymmang 22: U MLA ka South Shillong Constituency bah Sanbor Shullai ha ka sngi Saitjain ula pyllait paidbah ïa ka mang tyngka ba T.12,27,61,300 ban pyntrei ia ki skhim bapher hapoh ka
konstitwensi.
Ia kane ka mang tyngka la mang lyngba ka Urban Smart City/SUWP & PWD Roads-SPA Schemes naka bynta u snem 2022-2023 naka bynta ban tei iaki kam pynroi hapoh ka South Shillong konstitwensi bad la pyllait paidbah ia kitei ha ka jingïalang kaba la long ha Assam Club, Laban Shillong ha ryngkat ka jingïadonlang ki Rangbah Shnong, ki Sengkynthei ki Committee bapher bapher.
Ha kane ka jingialang, u bah Sanbor ula pynkup burom ruh iaki rangbah Shnong, ki nongsynshar shnong, ki Rangbah Shnong kiba rim bad kiwei kiwei kiba hap hapoh ka ka South Shillong konstitwensi.
Haba kren ha kane ka jingialang u bah Sanbor ula ong ba kane ka skhim ba kot haduh T.12,27,61,300 kadei ka skhim kaba nyngkong eh jong ka samoi treikam 2023-2028.
U bah Sanbor ula ong ba kane ka jinglah ban pyllait iaka song pisa kadei ruh namar ki paidbah kila pynjop biang ia u ban long u MLA ka konstitwensi bad ula ong ba ia kane ka song pisa la mang na ka bynta ki Dorbar Shnong bapher bapher kiba hap hapoh ka konstitwensi.
“Ki skhim bapher na ka sorkar pdeng kin sa wan tuid na ka por sha ka por bad ka daw ka jong kane kadei namar ba phi long ki briew kiba shemphang bad kiba stad ban pynjop ia u bah Sanbor na ka BJP na kata ka daw lyngba ka jingïarap jong u Myntri ka sorkar pdeng napoh Delhi, la ïoh ïa kane ka skhim” la ong u Bah Sanbor.
U bah Sanbor ula pyntip ba kitei ki skhim ki kynthup ïa ka jingpynitynnad ïa ka dong ka shnong, ka jingbuh ïa ki ia ki Bording Light ha ki dong bapher bapher, ka jingpyndait ïa ki CCTV Camera, ka jingpynbha ïa ki surok, ki nala bad kiwei kiwei ki kam pynroi.
