Shillong, Risaw 13 : U Myntri Rangbah ka Jylla Conrad K Sangma ha ka sngi Thohdieng, ula pyllait paidbah ia ka “CM Elevate” programme ha Tura, West Garo Hills ban pynbna ia ka mang tyngka ba kot T. 300 klur ka ban kyrshan ia 20 hajar ngut ki nongioh jingmyntoi (beneficiary).
“Ka India ka don bun eh ki samla ha ka jingdon paid bad ban pynkhlain iaka jingsengkam ha Jylla, ka Sorkar kala pyllait paidbah ia ka CM Elevate Programme. Lyngba kane ka Prokram, ka Sorkar kan ai grant haduh 75% kat kum ka kyndon jong ka skhim” ong u Conrad ha ka jingialang.
U Myntri Rangbah ula kyntu ia ki paidbah ba kin shim kabu ia kane ka prokram bad ban sdang ia ka jingsengkam ka ba lah ban aijam aijam bad ban pynshlur ia ka jingsengkam hapoh ka Jylla.
“Ki Samla ka Jylla kila ioh ia ka jingkyrshan na ka Sorkar lynga ka ‘Yess Meghalaya’ ba kin leh ia ki kam bapher bapher ki ban ai jinghikai bad pynkupbor ia ki samla jong ngi” ula ong.
U Conrad ula ong ba ka Yess Meghalaya kala kyrshan ia palat 1000 tylli ki kynhun ha kane ka shisnem bala leit noh bad bun ki kynhun n aka Jylla kin sa ioh ia ki song jingiarap.
“Ngin ai ka jingkyrshan ia ki Seng jong ki Samla ba kin pynlong ia ki jingai jinghikai bad jingpynshai kiba thmu ban pynkup bor ia ka imlang sahlang jong ngi. Lyngba kane ka prokram, ngi kwah ba kin samla kin bunkam ha ki kam kiba tei” ula ong.
U Conrad ula pyntip ruh ba ka Meghalaya Grassroot Music Programme (MGMP) kala kyrshan ia palat 1500 ngut ki artist ha kane ka shisnem bala leit bad kala lah ban sei pyrthei ia ka sap jong ki artist ka jylla.
Ula pynbna ruh ba naduh mynta u snem hapoh ka MGMP, ka Sorkar kan kyntiew bad kyrshan ia ki jingialehkai drama, khana puriskam bad kiwei kiwei, ki ban pyni sha ka pyrthei ia ka jingriewspah ka riti ka dustur jong ka Meghalaya.
Haba kren shuh shuh halor ka jingkyntiew ia ki kam sengkam sengjam, ula kren halor ka “PRIME” Meghalaya ha kaba ka Sorkar kala ai ia ka jingkyrshan sha ki samla.
Haba kren halor ka sienjam ban pynurlong ia ka Green Meghalaya, u Myntri Rangbha ula ong “Ngi kwah ban pynshlur ia ki Shnong ki thaw ba kin iai bteng ban iada bad sumar ia ki khlaw jong ngi. Ngi kwah an pynshlur ia ki Nokma ba kin iada ia ki khlaw, ha kaba kin sa ioh ia ka jingkyrshan song pisa na ka Sorkar”.
U pyntip ba ha kane ka shisnem bala leit, ka Sorkar kala pyllait palat T. 30 klur ka pisa sha ki Shnong ki Thaw ba kin iada ia ki khlaw ki btap. Ula ong b aka Sorkar kala buh thong ban iarap haduh 50000 hectare hapoh kane ka prokram.
Ha kane ka jingialang, u CM ula sam ruh ia ka song pisa ba T. 1.05 klur sha ki Dorbar Shnong kat kum ka Community Investment Fund (CIF) bad T. 60,98,595 hapoh ka Payment for Ecosystem Services. Kumjuh ruh hapoh ka Yess Meghalaya, ula sam ia ka bynta ba nyngkong ba 9,30,00 sha ki nongioh skhim bad 1,40,00 jong ka bynta ba-ar sha ki nongioh skhim.
.){kind=link}