Shillong, Risaw 17 : U Myntri Rangbah ka jylla u Conrad K. Sangma hynne ka sngi Baar ula ong ba palat 70,000 ngut ki samla ki dei kiba la kynjoh ha ka rta ban trei ban ktah (work force) man la ka snem bad ka long kaba kongsan ia ka sorkar ban thaw iaka polisi kaban plie lad ia ki ban rung ha ka ‘Iew pynioh kam’ (job market).
Good to be back in Jowai to launch the CM-ELEVATE program for Jaintia Hills region. Over 20,000 Aspiring Entrepreneurs from across Meghalaya will be supported through CM-ELEVATE through a financial grant up to 75% for the next 5 years with an investment of ₹300 Crore. This is… pic.twitter.com/Qdh3IHoUso
— Conrad K Sangma (@SangmaConrad) October 17, 2023
“Ka jingdawa ban ioh kam ka long kaba jur bha bad kam long kaba suk ia ka sorkar ban thepkam lut ia baroh. La jan kumba 1500 ngut kila iohkam ha ki tnad sorkar lyngba ka Meghalaya Public Service Commission (MPSC) bad District Selection Committees (DSC),” ula ong haba kdew ia ka jingdonkam ban thaw ia ki lad sengkam sengjam lajong ka ban kyntiew ia ka ioh ka kot ka Jylla.
Haba plie iaka programme CM Elevate ha Jowai ha ka jingdonlang ki MLA u Bah Wailadmiki Shylla bad ka Kong Santa Mary Shylla, u Myntri Rangbah ka jylla u Conrad K Sangma ula ong ba ka sorkar kala sdang ia kane ka prokram ban pynshlur bad ban kyntiew iaka sengkam lajong da kaba kyrshan ia ki 20000 ngut ki nongioh jingmyntoi ha ka jinglut jingsep kaban kot T.300 Klur ha ki 5 snem kiban wan.
Lyngba ka CM – Elevate, ki nongseng kam lajong ki lah ban applai ia kiba bun ki lad treikam kiban kyntiew iaka kam jngohkai, ka rep ka riang, ki kam pynbyrngia bad kiwei kiwei. Lyngba katei ka scheme ka sorkar jylla kan ai Grant bad Subsidy haduh 75% bad ia kaba tam yn sa pyniasoh bad ka ram kaba na ka Bank.
“Ngi la wanrah iaka policy ban kyntiew iakaj ingsen kam lajong ban iakhun pyrshah ia ka jingkyrduh kam kyrduh jam. Kane ka polisi kaba mynta kan long ka lad kaban pynbeit ia ka mat ha kaba iadei bad ka jingthaw ia ki kam ha ki 10-15 snem kiban wan” ong u Conrad bad ka banjur ba ka programme kum ka PRIME bad CM – Elevate kan btin, ai jinghikai bad pynkup bor ia ki samla ban donkti ha ki kam kiban ai jingmyntoi.
“Lymda bad katba ym pat thaw ia ki policy mynta, ngin mad ia ka jingeh kaba khraw ha ki pateng ban wan. Kumta ka long kaba donkam ia ngi ban tuklar ban pynthikna ba kata ka jingeh dei ban pynbeit noh” ula ong.
Ula pyntip ba palat 33 Lak ngut ki briew ha ka jylla kidei kiba don hapoh jong ka 45 snem ka rta bad ka mat jong ka jingpynmih ia ki kam kan iai bteng ban kiew bad kan buh ha ka jingeh ia ka jylla.
“Mynta kumba 70,000 ngut ki briew ki rung ha ki kam bapher bad kane kan sa kiew sha ka 1 lak ha ki snem ban wan” ong u Conrad bad ka banjur ba ka sorkar kala pynwandur iaka CM – Elevate ban weng ia ka jingeh kaba iadei bad ka jingkyrduh kam kyrduh jam bad ban thaw iaka sawdong sawkun da kaba thaw ia ki lad aikam aijam.
Ula pyntip ba ha ki 5 snem ban wan lyngba ka CM – Elevate, ka sorkar ka buh ia ka thong ban thaw palat 50,000 tylli ki kam ha ka jylla ha kal iang jongka jingseng kam lajong.
Da kaba pynpaw baka jingkhlain ka jylla kadei amar ka jingdon ki samla, kumta ka programme kum ka YESS Meghalaya ka ai iaka lad ia ki samla ba kin donbynta ha ki kam kiban pynthikna ba ka bor ka jongka la pynleit ha kaban leh ia ki kam kiba don jingmut bad kiba bha.
Ka YESS Meghalaya, kaba dei kaba la pynwandur da u Myntri Rangbah ka jylla u Conrad K. Sangma, la sdang ha u snem 2022 kaba kyrshan ia ki kynhun jong ki samla, ki society, kynhun trei mon sngewbha kiba pan jingkyrshan pisa haduh T.1 Lak na ka bynta ban ai ki jingpynsngewthuh paidbah, ki kam ai jinghikai bad kiwei kiwei.
“Ha kine ki shi snem kiba la leit, 1155 tylli ki kynhun jong ki samla kila ioh jingkyrshan na ka sorkar jylla bad ngin bteng ban kyrshan ia ki samla lyngba katei ka programme”, ula pyntip.
Ha ka programme kaba hynne ka sngi, la sam ia ki 37 tylli ki ‘Cheque’ lyngba ka Yess Meghalaya, Green Meghalaya bad SHG kaba kot baroh T. 1.25 Klur.
YESS Meghalaya has been supporting youth groups to engage young people in programs for their growth, ensuring they become positive contributors in their community. Cheques of ₹4.90 Lakhs were handed over to youth organisations of Jaintia Hills in Jowai today. pic.twitter.com/BQp2WMLlcN
— Conrad K Sangma (@SangmaConrad) October 17, 2023
Haba kren ha kaj ingialang ka Kong Santa Mary Shylla kala kyntu ia ki samla ban shimkabu iaka CM – Elevate programme bad kane ka sienjam kadei ka mawjam ban poi sha ka thong ban pynurlong ia ka jylla ban kynjoh sha ka jingioh ia ka ioh ka kot kaba10 Billion Dollar.
Katba u Bah Wailadmiki Shylla ula ong, “Nga dap da ka jingbishni ia ki samla ba ki ioh ia u Myntri Rangbah uba shemphang uba thaw ia ki lad ki lynti naka bynta ki samla ka jylla”.
U Bah Lahkmen Rymbui uba long u MLA ula ong, “Ngi long kiba donbok ba ngi don ia ka sorkar kaba don ia ka mon ban kyntiew ia ki nongrep, nongialehkai, nongsengkam lajong bad kiwei kiwei ki kam naduh kiba rit haduh kiba la heh. Ngam pat ju iohi ia kum kane ka jingtrei shitrhem na ki sorkar kiba la leit”.
Ha kane ka sngi, u Myntri Rangbah ula leit ruh ban jurip iaka Kiang Nangbah College bad Civil Hospital ha Jowai .
