Shillong, Naiwieng 24: U Myntri Rangbah ka Jylla Conrad K Sangma hynne ka sngi Thohdieng, ula pyllait paidbah ia palat 200 tylli ki kali kiba la mang na ka bynta ka Tnad Pulit.
Kine ki kali ki kynthup ia 80 tylli ki Bolero bad ki Camper, 140 tylli ki thuk thuk bad 6 tylli ki crane.
Kane ka dei ka jingthied kali kaba bun duh ha ka histori jong ka Tnad Pulit.
“Kine ki kali bad ki thuk thuk kin iarap ia ki Pulit jong ngi ha ka leit ka wan, ban sted ha ka jingpyndep ia ka kam bad jingshakri ba kham bha ia ki paidbah” ong u Conrad ha ka jingialang.
Kiba la iadonlang ha kane ka sngi ki kynthup ia u Symbud Myntri Rangbah kam pohiing Bah Prestone Tynsong, bad u Symbud Myntri Rangbah Bah Sniawbhalang Dhar, ka Myntri ka Koit ka Khiah Kong Ampareen Lyngdoh bad kiwei kiwei.
“Ngi la sam ruh ia kiwei ki tiar ba kongsan sha ki Pulit ka Shillong Traffic bad aiti ia ki kor Computer bad Laptop bad kiwei ki tiar IT sha ki Ophisar jong ngi kiba don ha ki District bapher bapher” ula bynrap.
Ul pyntip ruh ba ka dei ka jingangnud jong ka Sorkar ban pynkyllai janai ia ka jingtreikam jong ka Rnad Pulit lyngba ka jing pynbiang ia ki jingdonkam baroh bad kane ka jingthied kali kaba heh duh, kan iarap ia ka Sorkar ban ai ka jingshakri ba kham bha sha ki paidbah ka Jylla.
