Shillong, Jylliew 01: U Myntri Rangbah ka jylla u Conrad K Sangma, hynne ka sngi Palei ula pyllait paidbah iaka Prime Agriculture Response Vehicles ha
MAMETI, Upper Shillong.
U Conrad K Sangma ula ong ba ka tnad ka rep ka riang ha ki snem kiba la dep, da ka jingdon ia ki kor ki bor bad ki shlem kiba donkam, kala lah ban kyntiew bad ai jingkyrshan ia ki nongrep bad kala lah ruh ban kyntiew ia ka ioh ka kot jongki.
“Kumba 80 percent na ki briew jong ngi ki im da ka rep ka riang kumta ka long kaba kongsan ba ki nongrep kin ioh iaka jingkyrshan bad ka sorkar kala sdang ia bun tylli ki prokram na ka bynta jongki” ong u Myntri Rangbah.
U Myntri Rangbah ula ong ba kumba 50000 ngut ki samla wadkam ki mih man la u snem ha ka Jylla bad kumba 3000 ngut ki rung ha ki kam sorkar katba kiba sah pat ki iohkam ha ki jaka treikam shimet.
“Ha ki kam shimet ngi hap ban peit ha kaba iadei bad ka rep ka riang, Food Processing, kam jngohkai bad ha ki kam kiba iadei bad ka Service Sector kiba long kum ki bynta kiba kongsan jong ka jingaikam bad lada ngi pulom ha kane ka liang, ngin ym lah ban plie ia ka lad ka lynti ia ki samla ban iohkam” ula ong bad bynrap “Katba ngi dang pyrshang ban kyntiew iaka jingroi ki kam ha ka private sector ha ka jylla, ka rep ka riang bad ka Food Processing ki don ia ka bynta kaba khraw ban pynthikna ba ngin lah ban ai iaka jingmyntoi ha ka ioh ka kot ia ki paidbah bad ban thaw ia ki kam ki jam kiba donkam”.
U Myntri Rangbah ula pyntip ruh ba sa 200 tylli ki Prime Agriculture Response Vehicles yn sa sam ha ka wat ka baar.
Lyngba ka Prime Agri Response Vehicles, 200 tylli ki kali yn sa sam sha ki cooperative society, Self Help Group, Farmers Producer Organization bad sha ki riewshimet da kab ai iaka Subsidy kaba 50 percent ha kaba iadei bad ka jingpynlut pyn sep na ka bynta ban pynpoi Ia ki kali.
Ia kane ka skhim la pynwandur na ka bynta ki paidbah kiba sah ha ki thain nongkyndong kiba don ha ki jaka kiba jngai bha khamtam sha ki Integrated Village Cooperative Society na rilum Khasi bad Jaintia Hill.
Kila don ruh bun tylli ki Agriculture-Farming apps kum ka CROPSAP, Crop Pest Surveillance and Advisory Project, ka jinglum ia ki WEB bad Mobile application na ka bynta ka Crop Pest Surveillance bad Advisory Project Management System, Horticulture Hub MIS application na ka bynta ban lum iaki jingkhein jingdiah kiba man la ka sngi kum ka jingdie, jingai jinghikai ia ki nongrep, ban lum ia ki risit kaiphod bad ban pyniaid iaki jingdon ianki mar ki mata.
La pyllait paidbah ruh ia ka MEGAMB, Meghalaya State Agriculture Marketing Board, Meghalaya Farmer App bad ia ka website jongka MAMETI ha katei ka jingialang.
