Shillong, Jylliew 04 : U Myntri Rangbah ka Jylla Conrad K Sangma, hynne ka sngi Balang, ula pyllait paidbah ia k ‘Meghalibor’, ka lieng Yacht ba nyngkong eh ka Jylla ha Pung Umiam.
Ia kane ka yatch la pyllait ha ka jingiadonlang u Myntri ka tnad Jngohkai Bah Paul Lyngdoh, u Commissioner & Secretary ka tnad Jngohkai Jivay Kumar D bad u Director ka tnad Jngohkai bah CVD Diengdoh.
Haba ai jingkren ha ka jingialang, u Myntri Rangbah ula ong ba ka jingpyllait ia ka yacht ka long kaba don jingmut namar ka pyniasoh lang ia artylli ki bynt ba kongsan jong ka Sorkar kata ka long ka kam Jngohkai bad ka kam Ialehkai, ka ban wanrah ia ka jingktah kaba khraw.
“La ka dei ka kam jngohkai ne kam ialehkai, ngi don ia ka jingthmu, ka thong bad ka plan bad ruh ki jingthmu kiba kham heh ban thaw ia ki lad kamai jakpoh bad aikam iajam haba buh hapdeng eh ia ki samla ia kaei kaba ngi leh bad ka prokram ba mynta ka sngi ka dei ka jingpyniasohlang ia kine baroh” ula bynrap.
U Myntri Rangbah ula bynrap ruh ba haduh 50% na ki nongshongshnong ka Meghalaya ki dei kiba hapoh ka 20 snem ka rta, kumta ka Sorkar ka hap ban pyrkhat bha ha ka ban pynbit pynbiang ia ka jingdonkam jong kine ki samla bad ong “Ngi hap ban buh ia u mawnongrim ia ki bad ban ai ha ki ia ki lad ki lynti ha ki snem ban wan”.
Ula ong ruh ba ka pung Umiam ka don shibun ki lad ban shakri kim bym pat pyndonkam satia bad ka Sorkar kala sdang ia ki sienjam bapher bapher kum ka Water Sports (jingialehkai ha Um) bad jingking lieng ha pung Umiam nalor ka jingpynroi bad shna bha ia ki jingtei ha ka ban pynlong ia ka pung kum kawei na ki resort ba biang eh hapoh ka thain Lam Mihngi jong ka Ri.
Haba kren ia ka jingkongsan ka pung Umiam kum ka jaka ialehkai ia ka water sport, u Myntri Rangbah ula ong ba ia ka pung Umiam, kaba don ia ka sawdong sawkun kaba itynnad, lah ban nang pynroi shuh shuh ha ka kam water sport (jingialehkai ha um).
Haba iaroh ia ki nongialehkai kiba la wanrah nam ia ka Jylla ha ka National Games ba dang shu dep ha ka Kayaking bad Canoeiong, ula bynrap ba ka pung Umiam ka lah ban long ka jaka pdeng jong ki kam ialehkai hapoh Um ha ka Jylla.
