Shillong, Risaw 03 : Kum ka sienjam ban shimkhia ha kaban leh eiei ia ka jingpass duna ki khynnah ha ka jylla Meghalaya, u Myntri Rangbah ka jylla u Conrad K Sangma ula sdang ia ka sienjam ban kyrshan ia ki khynnah pule, nonghikai bad ki kmie ki kpa.
U Conrad K Sangma hynne ka sngi Palei ula pyllait paidbah ia ka jingtreikam jong ka CM IMPACT na ka bynta ka Garo Hills ha kaba la iadonlang u Myntri ka pule puthi u Rakkam A Sangma.
Kum shi bynta jongka CM IMPACT, ka tnad pule puthi kan ai ia ki Guidebook ia ki khynnah pule, nonghikai kaban long ruh ha ka dur jongka App, kaban don man la ka por ka updates ne ka jingpynrung ia kino kino kiba long thymmai.
Yn pynbiang ruh ia ka Internet ha ki block na ka bynta ba kin ioh pyndonkam.
Haba sam ia ki Guidebooks sha ki nonghikai, u Myntri Rangbah ula ong ba ka long kaba kongsan ba kiba donbynta baroh ban iakynduh man la ka por ban iakren bad ban pynkhreh man la ki por ia ki lad ki lynti ban shimkhia ia katei ka jingeh.
Haba pdiang ba ka don ka jingeh ha kaba iadei bad ka pule puthi, ula ong “Ngi hap ban law ia ki jyrwit jyrwat bad ban jam shakhmat da kaba don ia ka thong. Ngi la don ia ka jingthmu ban pynbha ia ka pule puthi. Ka jingthmu ka long ban kyntiew ia ka bha ka miat bad ia ka kyrdan bad kumjuh ia ka jingpass bha”.
Ula kyntu ia ki nonghikai ban weng ia ki jingeh ban kyntiew ia ka jingpass bha ki khynnah bad ban shimkhia ia katei ka mat. Ula bthah ruh ia ki nonghikai ba kin phiah ia ki khynnah pule ban lap ia ki jing duna ki jongki bad ban leh eiei ha ka ban pynbha ia ka jingioh marks.
Ula kyntu ruh ia ki nonghikai ban pynlong ia ki khynnah kiba la pynkhreh ba kin lah ban pass ia ki eksamin.
