Pyllait u CM ia ka CM-Connect ‘Public Forum’ ban pynjan ia ka Sorkar sha u paidbah

Shillong, Naitung 04 : Da ka jingthmu ban pynkhlain riti synshar paidbah ha ki shnong ki thaw bad ban pynthikna ba ki nongshong shnong kin iashimbynta ha ka kam ai jingshakri ka sorkar, u Myntri Rangbah ka jylla u Conrad K Sangma hynne ka sngi Palei ula plie ia ka CM-Connect “Public Forum” ha Adokgre, North Garo Hills.

Ka CM-Connect Public Forum kadei ka sienjam kaba la shim da ka sorkar jylla ban poi sha ki paidbah kiba don ha ki shnong ki thaw, ban sngap ia ka jingsngewkhia ka jongki bad ban pynbiang mardor ia ki jingai jingiarap. La pyndandur ia katei ka prokram ban wanrah ia ka jingiadei hapdeng ka sorkar bad ki nongshong shnong ban pynthikna ba dei ban iohsngew iaka sur jong ki paidbah bad ban shimkhia ia ka jingeh ka jongki.

Ha katei ka jingplie paidbah, u Myntri Rangbah ka jylla ula sngap ia ka jingud jingnam bad ka jingsngewkhia jong ki paidbah, kaba kynthup naduh ka jingiaid shakhmat jong ka jingtei ia ki jingkieng bad ki surok bad ka jingpynslem ban pyndep ia kitei ki kam, ka jingpyllait ia ki ram da ki bank, ka jingiaid suki ki kam ki jam bad u Myntri Rangabh ula ai ruh ia ka lad ba ki heh ophisar ka jylla, na ki district bad ki Block kin pynshai bad ban ai iaki jingtip kiba shisha bad kiba thikna halor kitei ki mat kiba la pynpaw da ki paidbah.

Haba kren ha ka jingialang, u Conrad K. Sangma ula pynpaw ia ka jingkongsan jong ki nongshong shnong ban iashimbynta ha ki kam synshar khaddar.

“Ka sorkar jong nga, ka iengskhem ban ai ia ka jingshakri kaba bha ia ki paidbah ka jylla. Ngi kwah ban shakri ia ki paidbah bad ban pynlong lang ia ki kum shi bytnta ha ka jingpyniaid ia ki kam synshar paidbah. Ia ki jingduna bad jingdkoh ha kaban pyntreikam ia ki skhim yn sa shimkhia bad ngin pynthikna ba ia ka sir jong u paidbah dei ban iohsngew” ula ong.

U Myntri Rangbah ula pynbna ba ia kum katei ka prokram yn sa pynlong ha kylleng ki 56 tylli ki Block jong ka jylla, ban plie ia ka rynsan ia ki nongshong shnong ba kin aiti ia ka jingujor bad ia ka jingsngewkhia ka jongki ha kaba iadei bad ka jingpyntreikam ia ki skhim bad ki prokram jong ka sorkar.

Ha katei ka jingialang la wan ban iashimbynta da katto katne ngut ki MLA kiba kynthup ia u Rupert Momin, Pongseng Marak, Sanjay Sangma bad u Ian Botham K. Sangma bad kiwei kiwei ki riewpawkhmat.

Ka CM-Connect Public Forum kadei ka sienjam kaba la shim na ka bynta ban pynkup bor ia ki paidbah bad ban pynthikna ba ka rukom ai jingshakri ka sorkar kan long kaba don ka jingkitkhlieh. Da kane ka sienjam, ka sorkar jylla kala pyni iaka jingskhem jingmut ban don ka khuid ka suba, ka jingkitkhlieh bad ka jingai shakri kaba bha naka sorkar.

Ha kaba iadei bad ka jingujpr jong ka jingslem palat ban tei iaka building kaba thymmai jongka Adokgre C&RD Block, u Myntri Rangbah ula batai ba ula don ia ka jingthmu ban buh noh ia u mawnongrim na ka bynta katei ka projek ha ka jingleit jurip ka jongu ha Adokgre.

Hynrei namar ba kila don noh ki kam kiba dang sahteng ha kaban shim ia ki jaka ki puta kumta ym shim la lah ban pyniaid shakhmat ban buh noh ia u mawnongrim kumba la thmu.

U Myntri Rangbah ula bthah ia ki bor sorkar ba kidei ban pynkloi ha kaban shim ia ki jaka puta bad ban pynthikna ia ka jaka hapoh u Naitung bad ula pynthikna ba shen yn sa buh mawnongrim noh bad yn sa wan hi dalade ban iashimbynta ha katei ka jingialang na ka bynta ban sdang noh ia katei ka projek.

Ha katei ka jingialang paidbah, kala mih ruh ka jingpan jingpynshai ha kaba iadei abd ka jingshna iaka jingkieng ha Adokgre-Mangsang kaban pyniasoh ia ka North Garo Hills bad ka East Garo Hills. U Myntri Rangbah ula bthah ia ki ophisar kiba dei khmih ban pynshai ia katei ka jingpynsngewk I paidbah bad ia katei ka kam la ioh ban pynshai noh mardor da ki Enginner ka tnad PWD. U Myntri Rangbah ula pynshai shuh shuh bad ula pynthikna ia ki paidbah bay n shimkhia ia katei ka mat khnang bay n lah ban pynbeit noh mardor.

Ki paidbah kila aiti ruh ia ka dorkhas ha u Myntri Rangbah, ha kaba kila kyrpad ban pynbha bad ban kyntiew noh ia ka Chenanggre Stadium ha Adokgre, kynthup ia ka jingtei iaka Multi-Facility Center.