Shillong, Rymphang 24: U Kyrtong ka seng NPP na North Shillong Constituency u Bah Ransom Sutnga ha ka miet sngi palei, ula pyllait paidbah iaka Appeal Election ha ka jingialang paidbah kaba la long ha YMCA Mawkhar ia kaba la wan ban sakhi da ki paidbah bad ki nongkyrshan ki jong u.
U Bah Ransom ula pynbna, ba lada u shah jied kum u MLA ka North Shillong yn pynsahnam ia ki 3 ngut ki riew rangbah ka Mawkhar kiba la khlad noh kiba kynthup ia u Dr Friday Lyngdoh, u Professor Korbar Sing bad Bah WHD Syngkon da kaba ai kyrteng ia ki 3 tylli ki surok ha ka shnong Mawkhar ban pynsahnam ia kine ki rangbah kiba la noh synniang iaka shnong bad iaka jaidbynriew.
Ha katei ka Appeal kaba la pyllait paidbah, u Bah Ransom Sutnga ula pynpaw ba lada jop iaka elekshon yn shimkhia ia kiba bun tylli ki mat kiba iadei bad ka Constituency bad ka jylla hi baroh kawei, kata iaka jingdonkam ban don iaki jaka pule kiba biang naka bynta ki khynnah pule, ban pynbha ia ki jaka ai jingsumar, ban pynkhie im biang iaka MCCL kaba don ha Sohra ba kan treikam biang, ka jingdonkam ban tei iaka Greenfield Airport ha ka jylla ban pynsuk ia ki paidbah khamtam ia ki nongjngohkai kiba wan sha ka jylla.
Ban pynshlur iaki paidbah ba kin shong da ki bos, kali kamai bad ki ar shaka haba ki leit ki wan bad ban tei ia ki jaka pynieng kali, kaban long shi bynta jong ka jingiarap ban pynduna iaka jingdheng kali ha ka nongbah.
Ula pynpaw ruh ha ka Appeal iaka jingdonkam ba ka sorkar jylla bad ki District Council ba kin ai jingithuh kyrpang ia ki Dorbar Shnong bad ban ai jingiarap kyrpang ia ki da ka song tyngka.
Ha kaba iadei bad ka Inner Line Permit (ILP), ula pynpaw ba ka iing dorbar thawain ka jylla kala ai jingmynjur iaka Resolution ban dawa naka sorkar pdeng ban pyntreikam noh iaka Inner Line Permit ha ka jylla hynrei ka sorkar pdeng haduh mynta kam shim la mynjur ia katei ka jingdawa.
“Dang shen, u National Secretary ka BJP u Rituraj Sinha ula ong, ba dang donkam ban iatai sani bha halor ka ILP namar kan ktah iaka kam jngohkai ha Meghalaya, hynrei kaba sngewlyngngoh ka long ba ka jylla Sikkim kadei ka jylla kaba kiew ka ioh ka kot na kam jngohkai hynrei mynta ki Paidbah ha ka jylla Sikkim ruh ki kwah ban pyntreikam noh ia ka ILP” la pynpaw u Bah Ransom.
Ula pynpaw ruh ba ka Meghalaya Land Transfer Regulation Act kadei kaba iada iaka khyndew ka shyiap jong ki riewlum ka jylla hynrei la donkam ban pynkylla noh ia ka ST List jong ka jylla katkum ka Constitution (Scheduled Tribe) Order, 1950 namar la kynthup lang ia ki jaidbynriew riewlum jong ka thaiñ shatei lam mihngi.
Ia katei ka jingialang la pyniaid da u Rangbah Shnong ka Mawkhar u Bah Arwan Tariang bad la ioh ruh iaka jingkren na u nongialam ka seng NPP Bah John F Kharshiing, ki nongialam bad nongkitkam ka NPP North Shillong kiba kynthup ia u Bah GEM Kharpuri, Bah G Jarain bad kiwei kiwei.
