Shillong, Nailur 21: Ka long ka sngi kaban sah jingkynmaw ha ka histori jongka jylla Meghalaya, haba u Myntri Rangbah ka jylla Conrad K. Sangma, hynne ka sngi Palei ula pyllait paidbah iaka CM-ELEVATE PROGRAM ha Vivanta, Shillong bad ka jingthmu jong kane ka sienjam ka long ban pynkupbor, ban kyntiew iaka jingsengkam lajong, ban kyntiew ia ka ioh ka kot ha ka jylla bad ban ai iaka lawei kaba phyrnai ia ki samla ka jylla.
The government will provide the subsidy and complete handholding support to businesses in collaboration with the banks.
CM-ELEVATE is one step further in our efforts to support the entrepreneurs of Meghalaya after witnessing the positive impact of our PRIME program. The program… pic.twitter.com/L0ktn5EXPC
— Conrad K Sangma (@SangmaConrad) September 21, 2023
Ha kane ka jingpyllait paidbah ia katei ka prokram la wan ban iadonlang ki Myntri ka sorkar jylla kiba kynthup iaka Dr.Mazel Ampareen Lyngdoh, Bah Paul Lyngdoh, Bah Alexander Laloo Hek, u Abu Taher Mondal, Bah Shakliar Warjri, u Rakkam A. Sangma, Bah Coming One Ymbon bad u Marcuise Marak.
U Conrad K. Sangma ula buh ia ka thong ban pyndonbynta, ban aikam aijam bad ban pynkupbor ia ki samla ka jylla lyngba ka jingseng kam lajong, kaba u ngeit skhem ba kadei ka lad ban pyndap iaka jingdonkam ha ka kam khaïï pateng.
“Ngi thmu ban thaw ia ki lad ban sengkam sengjam na ka bynta 20,000 ngut ki riewshimet ha kylleng ki bynta ha kine ki 3 snem ban wan. Kane ka sienjam kan dei ruh kaba ka jingbhah tyngka kan kot kumba T.300 Klur” ong u Conrad.
Haba iakren shaphang ka jingiatreilang ka sorkar bad ki Bank ban pynsuk iaka jingioh pisa na ka bynta kiba kwah sengkam lajong, u Myntri Rangbah ula ong ba ka jingkyrshan haka pisa ka tyngka kan long naduh 35 haduh 75 percent jong ka jinglut jingsep jong ka projek.
U Conrad ula ong, ban pynduna iaka jingma bad ia ki dieng pyngkiang, ngin ai jingkyrshan pisa ia ki nongsengkam bad ngi la iatreilang bad ki Bank ba kin bei iaka pisa. Ka Prokram kan ai iaka ram kaban kot haduh 95% jong ka jinglut jingsep jong ka projek kaba don ryngkat bad ka samoi jong ka jingshim ia ka ram naduh 5 haduh 15 snem bad ia ka por jong ka ‘Moratorium’ hapdeng 3 haduh 18 bnai, ryngkat ka jingshim iaka shah kaba long katkum ka jingiapher jong ki scheme.
“Ngi la dep thaw ia ki kam haduh 3 lak tylli ha ka Private Sector ha kine ki 5 snem kiba la leit bad nga ngeit skhem ba kine ki nombar kin sa kiew ha ki snem ban wan. Nga don ia ka jingngeit kaba skhem ba ka kamram jong ka sorkar ka long ban thaw ia ki polisi treikam, ban kyntiew ia ka rukom treikam kaba biang bad ban pynbiang ia ki jingdonkam ban kyrshan ia ki nongseng kam lajong. Kane kadei tang ka jingsdang bad haba ngi iaid shakhmat, ngin nang iai pynjanai ia ka rukom treikam bad ha ka jingbhah iaka tyngka kaba donkam” ong u Myntri Rangbah.
Katba u Bah Paul Lyngdoh, ula ong, ba ka CM-ELEVATE Programme ka pyni iaka jingkitkhlieh jong ka sorkar na ka bynta ka bha ka miat jong ki samla bad ia ka lawei jong ka Meghalaya.
Ula pynpaw iaka jingkyrmen ba ki samla ka jylla kin ioh jingmyntoi lyngba ki scheme kiba la aid a ka sorkar jylla bad ula batai ruh shaphang ki scheme lyngba ka tnad Tourism kaba kynthup ia ka Green Villa Scheme, Homestay Scheme, Motorhome Meghalaya Scheme bad Prime Tourism Vehicle Scheme.
Ka Dr. Mazel Ampareen Lyngdoh, kala ong, ba kane ka prokram ka long kaba kongsan bha ha kaba iadei bad ka kam rep kam riang bad kan pynkhlain bad kyntiew ia kikam kiba iadei bad ka rep ka riang ha ka jylla. Da kaba ai 50% ka jingiarap pisa ban tei ia ki Polyhouses, ka prokram ban kyntiew ia ka jingrep ia ki jhur ki jhep kiba rem bad ki syntiew ki skud.
