Shillong, Nohprah 24: U Bah Lambor Malniang, MLA bad MDC barim ka Nongkrem Constituency ha ka sngi Palei, u la pyllait paidbah ia kawei ka jingrwai Christmas kaba la ai kyrteng ‘Aiu Phin Leh’.
Ia kane ka jingrwai kaba la ring dur bha, kaban pyni paidbah hapoh ka Youtube Channel, Antor Entertainment la pyllait paidbah ha ka jingsakhi lang bad kiwei de ki riew rangbah.
Ia ka jingring dur ne ki video la pynbit pynbiang da u Director bad Producer Bah Nick Shangpliang bad ka jingshad la shim bynta da ka kynhun Wanz Dance Evolution (WDE-Laitkor Branch).
Ha kane ka janmiet, u Bah Lambor Malniang u la ot ruh ia u Cake kum shi bynta jong ka jingrakhe Christmas.
U Bah Lambor u la ai khublei Christmas ia baroh kiba la ia don bynta lang ha kane ka jingrwai Christmas bad kumjuh ruh ia ki paidbah jong ka Nongkrem Constituency bad jong ka jylla hi baroh kawei.
