Nongstoiñ, Risaw 17: Ki kontraktor jong ka West Khasi Hills, kiba ju їoh ban pyntrei їa ki jingtrei ha ki tnad treikam bapher bapher kum ka PWD, PHE, Water Resources bad kiwei kiwei, ki la kyntu jur їa ka sorkar ba kan pyllait noh їa baroh ka pisa jong ki jingtrei kiba ki la pyndep naduh ki snem ba la leit noh kiba khlem pat siew haduh mynta.
Katto katne ki Kontraktor haba ïakren bad u nongthoh khubor, ki la ong ba ka jingpynsahteng jong ka sorkar ban siew їa ki bill jong ki da ki bun bun snem, ka nang pynbun shuh shuh ïa ka ram ka shah jong ki.
Ki la ong ba ka sorkar ka la dei ban shimkhia ban ym pynsahteng їa ki bill jong ki Kontraktor khamtam ha kum kane ka por ba ka kamai kajih bad ka їoh ka kot jong ki paidbah ka hiran haduh katta katta.
Ki la ong ba ka khlam Covid-19 ka ktah ruh ym tang їa ki Kontraktor kiba dap ram hynrei wat ki riew paidbah kiba im da ka bylla sngi ruh ba bun kiba sah ram ha ki nongai bylla.
Ki la ong “Ha West Khasi Hills, 90 % ki paidbah nongshong shnong ki dei kiba im ha ki kam bylla bad ki kontraktor. Haba ka sorkar ka pynslem ban pyllait їa ki bill, ki nongbylla ki la hap ban bam ram na ki dukan namar kim don da kawei pat ka lad ban kamai pisa lait tang da kaba leit bylla”.
Ki la ong ruh ba lada kheiñ їa ki nongtrei sorkar haduh mynta, ha West Khasi Hills ym pat don uwei ruh u nongtrei sorkar u ba lah ban ai kam wat tang lai ngut ne saw ngut ki nongshong shnong, lait noh tang ïa kito ki nongtrei їing kiba ki la khot khnang ban peit їa ka їing ka sem jong ki.
