Shillong, Jylliew 09 : U Vipul Raghuvanshi, hynmen jong u Raja Raghuvanshi uba shah pyniap ha Sohra, ula ai ka jingiaroh ia ki Pulit ka Meghalaya halor ka jingtohkit bad ka jingkem ia ka kurim u Raja, ka Sonam, kaba dei ka nongsuhbuit ban pyniap iala u kurim ha ka jingwan leh honeymoon sha Sohra.
Haba kren sha ki lad pathai khubor hadien ka jinglap bad jingleit pyndem ka Sonam ha Ghazipur, Uttar Pradesh, u Vipul ula pynpaw ia ka jingkyndit, ka jingshet kylla bad ka jingkulmar jingmut halor kiei kiba jia baroh.
U Vipul ula pynpaw ba um don jingtip satia ia ki briew kiba la shah kem tad hadien ba ki kyrteng jong ki, kila mih ha ki lad pathai khubor. Uwei na ki runar ba suba hakhmat eh ba kyrteng u Raj Kushwaha, u dei uba la iaren man ka sngi bad ka Sonam. “Ngam don jingtip shalang kita ki 3-4 ngut ki briew tad haduh ba mih ha ki lad pathai khubor….ka kyrteng u Raj Kyshwaha kala mih hakhmat, kaba mut ba ka Sonam ka lah ban donkti ha kane ka jingpyniap” ong u Vipul.
Kat kum ka jingong jong u, u Raj Kushwaha u dei uba la aikam da ka Sonam. Kine ki arngut kila iakren man ka sngi lyngba ka phone-kaba pynmih ia ka jingkylli halor ka jingiadei jong ki bad lehse ka jingiasuhbuit ban leh ia kane ka kam. “Ki ju iakren man ka por lyngba ka phone” ula bynrap.
Haba kynmaw ba u Raja bad ka Sonam ki ju pyni ba ki kmen bha ha ka por ba iapynbeit ba kin iashong kurim, u Vipul ula kubur ba ki bahaiing jong u kim ju poi pyrkhat ba kum kane ka jingjia kan jia. “Ngim ju poi pyrkhat ba ka Sonam kan leh ia kat kane ka kam” ula ong haba kyiuh artad artad.
U Vipul ula pynksan ruh ia ka Sorkar Meghalaya, kaba la shah kynthoh jait pa ki jait namar ki jingkynnoh ba kaa jingai khubor ba shu pynman hi da ki National media. “Ka Sorkar Meghalaya kam shym la thoh halor ka jingdonkti jong kiwei ki briew” ula pynthikna haba pynpaw ia ka jingngeit kaba skhem ia ka jingtohkit ki Pulit ka Meghalaya kaba dang iaid mynta.
U Vipul ula iathuh ba um pat ju iakynduh ne iohi satia ia u Raj Kushwaha hynrei ula ju iohsngew teng ia kane ka kyrteng jong u ba ki iakren. Kane ka jingkren jong u kala nang ai jingshai shuh shuh ia ki jaka ba kine ki shijur ki thmu ban leit.
“ Ha ka jingshisha ki dei ban leit tang ha Assam ban leit pyndem ha ka jingduwa ha Maa Kamakhya Temple. Hadien kane, kila ong ba kin ialeitkai sha Shillong. Ngim tip shuh mano napdeng kine ki arngut kiba iaplan ban leitkai sha Meghalaya. Kim shym la book satia ia ka ticket ban wan phai”.
Ka jingiathuh ba kim shymla book ia ka ticket ban leit phai, kala nang pynsuba shuh shuh, ba kane ka jingwan kai ka dei kaba don ia ka jingthmu sha lyndet.
Kumba long mynta, ki laingut kila shah kem ha ki Pulit ka Meghalaya na Indore bad Uttar Pradesh bad ka Sonam kala pyndem ialade. Ki Pulit ki ngeit ba ka Sinam kala suhbuit ban pyniap iala u kurim da ka jingiarap ki briew jong ka-lehse u briew ba ka don jingiadei samla.
Ka jingtohkit ka dang iaid mynta bad ka jingthwet sa ia uwei u briew (uba saw) ka dang iaid shakhmat.
