Shillong, Rymphang 17 : Ka United Democratic Party (UDP) hynne ka sngi thohdieng, kala pyllait paidbah ia ka manifesto jong ka elekshon MLA ban long la 27 tarik Rymphang bad kular ba lada ka wan haka bor, kan sa shong bishar thymmai ia ka Memorandum of Understanding (MoU) bala iasoi hapdeng ka Assam bad Meghalaya haba iadei bad ka jingpynbeit ia ki hynriew tylli ki jaka ba don hapdeng ka jingiakajia.
Ia kane ka manifesto la pyllait da u Vice President ka UDP Bah Allantry F Dkhar ha ka jingiadonlang u MLA barim ka Nongkrem Bah Lambor Malngiang bad President ka UDP Women’s Wing Kong Pretty Pongrope. Kane ka manifesto ka kren halor ka jingwanrah ia ka sorkar kaba khuid bad ba lait na ki kam bamsap.
“Ngi ngeit ha ka jingtreikam ban wanrah ia ka roi ka par kaba neh slem bad ngim sngew iahap ia ki jingtyrwa ia ki mar sam ei (freebees)” ong u bah Allan.
Haba pynpaw ba ka Jylla ka don ia ka jingkylla bad jingpynkylla, ula ong “Ka party kan pynleit jingmut ha kaban ai ia ka sorkar kaba biang tam bad kaba ba khuid ba shai ha ka jingpyniaid ia ki kam ki kam bad ka jingkiew shaphrang ha baroh ki kam”.
Haba kut jingmutban wanrah ia ka Meghalaya kaba koit ba khiah, ka UDP kala kular ban ai ia ki lad jingiarap kiba long mar kumjuh bad ba lah kot bor ia baroh-ban kyntien kyrdan ia ki jingtei bad ban pynjanai ia ka jingtreikam jong ki Nongtrei ka koit ka khiah.
Ka UDP kala kular ruh ban rat dyngkhong ia u droks bad ka jingjyllei u droks bad ban pynduna ia ka jingiap jong ki Kmie ba kha khun bad ki Khunlung ba dang shu kha da kaba buh ia ka Prenatal bad Postnatal Case Centre nalor ban nang pynheh ia ka Health Insurance hapoh ka MHIS.
Ka UDP kan ai sam ei ia ki kot skul sha ki Khynnah leit skum na ki longiing ba duk, ban buh ia ki skul ba kyrpang ia ki Khynnah ba hap khmih kyrpang bad ban pynthikna ba ki Residential School kin treikam noh kham kloi.
Ka Manifesto ka ong ruh ba ka UDP kan ai ia ki song jingiarap da ka pisa sha ki briew ha ka rep ka riang, horticulture, animal husbandry, pisciculture, apiculture, floriculture, food processing, ban buh ia ki cold chain bad warehouses, ki skhim bhalang ia ki Nongrep bad ban pyntreikam ia ka Minimum Support Price nalor kiwei kiwei.
Halor ka shongsuk shongsain, ka UDP ka kular ban pynkhlain ia ka Tnad Pulit da kaba thepkam lut ha ki kam ba lait nalor ban pynkha ia ka Tnad Pulit ba khmih ia ka khappud (Border Force), ka ban khmih ia ka jingshngain ha ki jaka khappud bad kiwei ki Jylla lem bad kiwei ki Ri.
Haba ban jur ia ka jingkut jingmut ban buddien halor ka jingdawa pyntreikam ia ka Inner Line Permit (ILP), ka UDP ka iai ban ruh ia ka jingdonkam ban pyntreikam ia ki ain ka Jylla bala don lypa kum ka Meghalaya Residents Safety and Security Act.
“Ngin nang bteng ruh ban pynkohnguh ia ka Sorkar Pdeng ba kan pynrung noh ia ka ktien Khasi bad Garo ha ka khyrnit ba phra jong ka riti synshar ka Ri, kat kum ka resolution bala mynjur da ka Iingdorbar thawain ka Jylla” kala ong.
Haba ban jur ia ka jingdonkam ban kyntiew ia ki kam jngohkai ha Jylla, ka manifesto ka ong ba ka party ka kwah ban wanrah ruh ia ka medical tourism bad ban wad ia ki lad ki lynti ban wanrah ruh ia kiwei kiwei ki kam ba iadei bad ki kam jngohkai.
Kala ban jur ruh ia ka jingdonkam ban pynkylla ia ka rukom treikam jong ka MeECL ban pynthikna ia ka jingpynmih bording kaba pahuh hapoh ka Jylla.
