Shillong, Jylliew 10 : Ka jingsdang jong u Myntri Rangbah Duh Narendra Modi ia ka samoi ba lai ha ka Ophis kala long ka jingkyrkhu ia ki Jylla ka thain Shatei Lam Mihngi khamtam ha Meghalaya, da ka jingpynbna ka Finance Ministry ban pyllait haduh T.1,39,750 klur ka instalment kum ka jingsam ia ka khajna sha ki Jylla hapoh ka Ri.
Ka Meghalaya kala ioh ia ka song pisa kaba heh duh na ki Jylla ka thain hadien ka Assam bad ka Arunachal Pradesh.
Kane ka jingpyllait pisa na ka jingiasam ia ka khajna kan pynlong ia ki Sorkar Jylla ba kin lah pyntrei pynsted ia ki kam pynroi bad jingpynlut pisa.
Ka Meghalaya kala ioh haduh T.1071.90 klur hashuwa jong ka Manipur kaba ioh T.1000.60 klur, ka Tripura kaba ioh T.989.44 klur, ka Nagaland (Rs. 795.20 crore), Mizoram (Rs. 698.78 crore) bad ka Sikkim (Rs.542.22 crore).
Haba buh hakhmat ia ka jingheh u pud u sam bad jingdon briew, ka Assam kala ioh iaka song pisa ba heh duh na ki Jylla ka thain kaba kot haduh T.4371.38 klur bud sa ka Arunachal Pradesh kaba kot T.2455.44 klur.
Kat kum kane ka jingsam bhah, ka Uttar Pradesh kala ioh bun she ia ka song pisa kaba kot haduh T.25069.88 klur, bud sa ka Bihar kaba ioh T.14056.12 klur. Ka Jylla kaba wan ba lai ha ka jingioh bun eh ia ka bhah ka dei ka Madhya Pradesh kaba kot T. 10970.44 klur.
