Shillong, Risaw 14 : Ka Sorkar Jylla kala pyllait ia ka song pisa ba T.79.5 klur sha ka Garo Hills Autonomous District Council (GHADC) na ka bynta ba kan siew pynkhuid noh ia ka tulop ba pynsahteng jong ki nongtrei.
Na kane ka song pisa, T. 11 klur la mang sha ka jingsiew ba hap ban ai sha ka GHADC, katba T. 68.5 klur ka dei kum ka jingsiew lypa (advance) ia ka bhah khajna jong ki snem ban wan.
Haba pynbna ia kane ha ka sngi Balang, u Myntri Rangbah Conrad K Sangma ula ong “Ngi la dep siew ia ka song pisa ba T.79.5 klur sha ka GHADC, ha kaba na kane ka pisa kumba T. 11 klur ka dei ka jingsiew ba ki dei ban ioh, kaba dei ka hok jong ki bad kaba tam T.68.5 klur ka dei ka jingsiew lypa (advance) na ka bhah khajna jong ki snem ban wan”.
Kat kum ka jingong jong u, kane ka song pisa ka dei kaba la mang bad pyllait sha ka escrow account, kaba la mang beit thik tang sha ka jingsiew tulop.
“Da kane ka song pisa, ka GHADC mynta kan lah ha ka ban pyllait noh ia ka tulop ba 12 bnai jong ki Nongtrei” bynrap u Conrad.
U Myntri Rangbah ula pynpaw ruh ba ka kyndon kaba la buh da ka Sorkar ka long ba u Principal Secretary yn peit thuh ia ka jingpyndonkam ia ka pisa pilain khnang ban pynthikna ba ia kane ka pisa la pyndonkam tang na ka bynta ka tulop.
“Ngi la ban jur ba ka jingpynkylla ka dei ban wan, ka Service Rules ka dei ban don bad ka jinglum khajna ka dei ban kiew. Ngi kyrmen ba ynda baroh kine kiei kiei kiba don ha ka jaka kaba dei, ngin sa iohi ia ka jingskhem ha ka pisa tyngka ha GHADC” ula ong.
Ka Sorkar Jylla kala tyrwa ruh ia kane kajuh ka jingtyrwa sha ki artylli ki ADC-ka Jaintia Hills Autonomous District Council (JHADC) bad ka Khasi Hills Autonomous District Council (KHADC), ba kan ai iakum kane kajuh ka jingiarap. Hynrei, ka rai ban iashimbynta ne pdiang kan shong eh ha kine ki artylli ki Council.
“Ki artylli ki ADC (JHADC bad KHADC) kim pat phah satia ia ka kaiphod sha ngi bad ngin sa nang iapynbeit bad kine ki ADC. Kane ka jingtyrwa ka treikam ruh ia ki. Ngi don hangne ym ban pynbor iano iano, ngi don hangne ban iatreilang bad ban kyrshan kat kaba lah” pynkut u CM.
 na ka bynta ba kan siew pynkhuid noh ia ka tulop ba pynsahteng jong ki nongtrei.){kind=link}