Shillong, Nailur 08: Ka Sorkar Jylla kala pyllait T.6.17 klur ka pisa jong ka Umbrella Scheme Post Matric Scholarship, ka ban ai jingmyntoi ia ki 10,346 ngut ki samla pule Scheduled Tribe hapoh ka jylla.
Kane ka pisa ka dei ka bynta kaba ar (second installment) na ka bynta u snem pule 2024-25, kaba kynthup ïa ki samla pule professional degrees, postgraduate, bad doctoral courses.
Ka kyrwoh ba la pyllait da u Director ka Higher and Technical Education ka ong “La pyllait ia ka bhah kaba ar jong ka Umbrella Scheme Post Matric Scholarship na ka bynta ki samla pule Scheduled Tribe (ST) jong u snem 2024–25 (Fresh bad Renewal) sha ki 10,346 ngut ki samla pule Professional Degree, Postgraduate bad Doctoral Courses.
“La pyllait haduh ₹6.17 klur na ka pisa ba dang sah namar ba ki don ki nongaplai ki bym shym la pyniasoh ia u Aadhaar bad ki bank account jong ki. Katkum ki jingbthah ka tnat Ministry of Tribal Affairs, ka Sorkar India kam ju pyllait iaka pisa lada ka pisa kaba dang sah ha SNA scholarship account, da kaba pyndonkam ia kane ka pisa kaba sah, ka tnat mynta kan pyllait ia ka bynta kaba ar na ka Sorkar India” kala ong.
Ka kyrwoh ka pyntip ruh ba ban siew ia ki Scholarship na ka bynta ki 60,226 ngut ki samla pule kiba dang sah, ka tnat ka donkam T.102.4 klur.
“Kumba ju long, ia kane ka pisa la pyllait da ka Sorkar India ha ki 2–3 tylli ki bynta. Hynrei, hapoh ka jingbthah jong u Myntri Rangbah ka Jylla ka tnat kan pyllait ia ka pisa anka bynta ka scholarship da kaba mynjur lypa naka pla tyngka ka Sorkar Jylla”.
Iaka pisa scholarship ba pura na ka bynta ki samla pule kiba dang sah yn sa pyllait ha ka taiew ba ar jong u bnai Nohprah 2025.
