Shillong, Jymmang 05 : U Myntri Rangbah ka Jylla Conrad K Sangma hynne ka sngi Nyngkong, ula pyllait paidbah ia ka skhim Meghalaya Health Advancement Policy, kum shibynta ban kyrshan pisa ia ki hospital ba shakri khlem ka jingioh nong (non-profitable Hospital) ha ka Jylla.
Kat kum kane ka skhim, kine ki hospital kin sa ioh mar T. 2 klur na ka Sorkar Jylla.
Ia kane ka skhim la sdang pyntreikam hi hynne ka sngi da ka jingaiti u Myntri Rangbah ia ka instalment ba nyngkong kaba kot T. 1 klur sha ka Tura Christian Hospital bad ka Holy Cross Hospital, Tura.
“Ngin kyrshan ia 5 tylli ki hospital ba shakri khlem ka jingiohnong ha kylleng ka Jylla hapoh kane ka policy da kaba ai ia ka jingiarap song pisa ba kin kyntiew kyrdan ia ki jingtei” ong u Myntri Rangbah.
Ula ong ba ki Hospital ki lah ban pyndonkam ia ka pisa ban tei ia ki jingtei kiba donkam, ban pynmih ia ki kamra thymmai, ban thied ia ki tiar ki tar sumar bad kiwei kiwei.
“Kane ka jingkyrshan ka long kum ka dak ka jingai khublei bad ka sienjam ban kyntiew ia ki lad ai jingsumar kaba neh hapoh ka Jylla” ula bynrap.
U pyntip ruh ba ia ka instalment kaba ar, yn sa pyllait da ka Tnad ka Koit ka Khiah hadien ka jingaiti ia ka Utilization Certificate jong ka instalment ba nyngkong.
Haba iaroh ia ki hospital ba pyniaid da ki missionary bad ki seng trei mon sngewbha ha Jylla, ula ong ba ka jingkyrshan jong ka Sorkar ka long kum ka dak ka jingsngewnguh ia ka jingshakri ba kine ki jaka sumar ki ai. “Kam dei satia tang ka jingkyrshan song pisa, ka dei ka dak ka jingsngewnguh naduh ka mynsiem. Bunsien, ym ju don ba iohi ia ka jingshakri ba khlem thait jong ki nongtrei ka koit ka khiah, ki nos, ki doktor bad ki bor pyniaid ki hospital. Mynta ka sngi, nga kwah ban ai khublei kyrpang ia iwei pa iwei na phi kiba la wanrah ia ka jingkylla ha ka jingim ki briew” ula bynrap.
Nalor ki hospital ha Tura, ia kane ka song pisa yn sa ai ruh sha ki hospital ha Jowai bad Shillong.
“Ka Sorkar kala kut jingmut ban kyrshan ia ki hospital kiba la synniang ha ka jingshakri ia ka imlang sahlang bad leit rah ia ki lad jingsumar khamtam sha ki jaka kibym don ia ki lad jingsumar”.
