Shillong, Nailar 07 : U Myntri Rangbah ka Jylla Conrad K Sangma ha ka sngi Palei, ula ong ba ka Jylla kala pyllait ia ka song pisa ba T.120 klur sha ka Garo Hills Autonomous District Council (GHADC), kaba dei ka bhah khajna.
“Ka Sorkar Jylla kala pyllait ia baroh ka bhah khajna sha ka District Council. Kam don shuh ka pisa ba dang sah” ula ong.
Ula pyntip ba ha ka por ba synshar ka NPP, 80% ka tulop ki nongtrei ka GHADC lah dei siew khuid. “Ki arrear ba dang sah ki dei jong ki snem bala leit, ki bym pat shym la siew khuid satia” bynrap u Myntri Rangbah.
Haba pynshai ba ka Sorkar Jylla kam shym la synshar ia ki District Council, u Myntri Rangbah ula ong “Ka Sorkar Jylla kam don satia iaka jingbahkhlieh ban siew ia ka tulop ki nongtrei ka GHADC. Ka kamram jong ka Sorkar ka long ban sam ia ka bhah khajna sha ka Council. Ka Council ka treikam bad pyniaid ia ki ka ki jam na ka jingpynmih pisa bala pynmih n aka bhah jong ka khajna bad kiwei kiwei ki khajna ba k alum hi”.
Haba pynpaw ba ka GHADC ka don palat 2000 ngut ki nongtrei ha ka por ba shimti ka NPP ia ka bor synshar, ula pyntip ba ka Executive Committee (EC) ba mynta kala shim ia bun ki sienjam ban pynbeit ryntih ia ka rukom treikam ha ka District Council.
“Ka kam ba iadei bad ka jingsahteng ka tulop ka dei ka kam jong ki snem bala leit. Ka dei ka kam kaba sngewkhia bad ka Sorkar Jylla kala ai ia baroh ki jingkyrshan sha ka Council da kaba pyllait biang por ia ka bhah khajna kynthup ia ka jingai lypa ia ka bhah” ula bynrap.
, kaba dei ka bhah khajna.){kind=link}