Shillong, Lber 10: Ka Sorkar Pdeng kala pyllait T.23.4 Klur na ka bynta ka Shillong Governmnet College of Engineering.
“Ka pisa baroh kaba la mang na ka bynta ka project ka long T.26 Klur ha kaba ka jingbhah ka long 90:10 bad ka pisa kaba la pyllait da ka Sorkar India ka long T.23.4 Klur” la ong u Myntri ka pule puthi u Rakkam A Sangma haba wanrah ia ka jubab hapoh iing dorbar thawain ka jylla hynne ka sngi Nyngkong.
Ula pyntip ba ha ka 26 tarik u Nohprah 2024, ka Shilong Government College of Engineering kala applai ban ioh ia ka jingmynjur na ka AICTE ban sdang noh ia ki artylli ki Technical Course kaba kynthup ia ka Civil Engineering bad Electrical Engineering.
Kumta la pynlong ia artylli ki jingialang khmih bniah jongka AICTE ha ka 22 tarik u Kyllalyngkot bad 4 tarik u Rymphang 2025.
Ki riewshemphang jongka AICTE kila bthah ia ki bor pyniaid jong ka college ba kin bud ryntih ha kaba iadei bad ka jingdon ia ki jingduna ha ki jingtei bad ia kane kila shimkhia, ula ong.
Ka jingtei ka kynthup ia ka Academic Block, Administrative Block bad ka Boys’ & Girls’ hostel jongka Shillong Government College of Engineering, Shillong la tei pyndep bad plie da u Myntri Rangbah ha ka 16 tarik u Kyllalyngkot 2023.
Ki jingtei kiba kynthup ban pynpoi ia ka umbam umdih, ka jingpynpoi ia ka bording elektrik bad kiwei kiwei kidei kiba la pynbiang.
U Rakkam Sangma ula ong ba ka sorkar kala pyntip ban tei iaka College bad la pynmih ruh ia ki 55 tylli ki kyrdan.
“Ka sorkar kala ailad ia u Additional Director Polytechnic & Shillong Engineering College ban bat lang ia ka kyrdan Principal jongka Shillong Government College of Engineering. Ka sorkar kala pyntip ia ka jingmynjur ban buh ia ki 13 tylli ki tnad kiba la don lypa jong ka Shillong Polytechnic kiba la lah (qualified) ban ai jinghikai ha ka Engineering College,” ula ong bad ka bynrap ba ka NEHU kala pyntip halor ka jingmynjur ban ai ia ka ‘Provisional Affiliation’ ia ka Shillong Government College of Engineering na ka bynta 3 sien.
