Shillong Nailur 08: Ka Ophis jong ka District Tuberculosis Officer, East Khasi Hills hynne ka sngi Thohdieng, kala pynlong ia ka prokram ban sdang pyntreikam ia ka Ni-Kshay Mitra Project halor ka “Food Distribution on Community Support Scheme for TB Patients by Doctors For You”’, ha Reid Provincial Chest Hospital Hall, Jhalupara, Shillong.
Ka ‘Doctors For You’ kadei ka kynhun trei mon sngewbha kaba shim ia ka sienjam ban iarap ia ki 100 ngut ki nongpang TB ha East Khasi Hills district ha kaban pynbiang ia ka bam ka dih kaba tei ia kitei ki nongpang kiba la ioh iaka jingkyrshan na ka MYLAN Pharmaceuticals Pvt. Ltd, Bangalore.
Lah ban kdew ba ia ka NI-KSHAY MITRA la pyllait paidbah da ka President ka ri India hapoh jongka Pradhan Mantri TB Mukth Bharat Abhiyan ha ka 9 tarik u Nailur 2022 ban pynthikna ba kan don ka jingiai bteng ban ai jingkyrshan da ka jingai iaka bam ka dih, ka jingai jingsumar bad ban ai iaki dawai dashin bad ka jingai jinghikai.
Ia katei ka prokram la wanrah da ka jingthmu ban iakhun pyrshah bad ban rat dyngkhong iaka jingpang TB hapoh ka ri baroh kawei hapoh jong u snem 2025.
Lyngba katei ka prokram la ai jingiarap ia ki nongpang TB lyngba ka Corporate Social Responsibility ban ai iaka jingsumar kaba khambha, ban kyntiew iaka jingmih shakhmat ka imlang sahlang ban pynurlong iaka jingthmu ban pynduhjait iaka jingpang TB.
Ka Deputy Commissioner jong ka East Khasi Hills, ka Kong R.M Kurbah kum ka Kongsan haba kren ha katei ka jingialang kala ai khublei iaka Doctors For You, kaba la shim iaka sienjam ban ai jingiarap ia ki nongpang ha ka district bad ka kyrmen skhem ba lyngba kane ka projek yn lah ban rat dyngkhong ia ki jingpang TB na ka imlang sahlang bad ha kari hi baroh kawei.
Kala kyntu ruh ia ki nongpang ba kidei ban dih tista ia ki dawai dashin bad ban shimkabu ia ki projek da kaba bam ia ki jngbam kiba tei khnang ba kan long ka jingiarap ba kin ioh noh iaka jingkoit jingkhiah.
Ha katei ka prokram ka Kong Kurbah kala aiti ia ki jingbam sha ki nongpang ha kaba la iadonlang Dr M Mawrie, State Tuberculosis Officer bad kiwei kiwei.
