Shillong, K’Lyngkot 12: U National President ka National People’s Party (NPP) Conrad K Sangma u badei ruh u Myntri Rangbah ka jylla ula ong ba ka sorkar jylla ba ialam daka NPP kala wanrah shibun ki plan bad kala pyntreikam shibun ki skhim, projek bad ki prokram naka bynta ban pynsted iaki kam pynroi hapoh ka jylla.
We were joined by thousands from across Meghalaya at the General Election Meeting of the NPP in Shillong as we addressed the public alongside our candidates & leaders of the party.
The show of strength today is humbling & heartening. I thank all our supporters. pic.twitter.com/NdASN8hso7
— Conrad Sangma (@SangmaConrad) January 12, 2023
Haba kren ha ka jingialang elekshon jong ka NPP halor ka mat “Stronger Together” ne “kham khlain ban iadonlang”, ba la pynlong ha Madan Polo, u Conrad ula ong ba ki kam pynroi hapoh ka jylla kila kiew sted bha ha kine ki 5 snem.
Ula iathuh ba ka jylla kala kiew ha ki thup naduh ki Social Sector bad ki jingtei (Infrastructure) hapoh ka jylla.
“Ka sorkar jylla ba ialam daka NPP ha kine ki 5 snem kala wanrah shibun ki kam pynroi lada ia nujor iaki kam pynroi ba kiwei ki sorkar kila wanrah ha ki 50 snem ba ka jylla kala dap” la ong u Conrad.
Ha kane ka sngi u Myntri Rangbah ula pyllait ruh iaka kaiphod treikam jong ka sorkar jylla naduh 2028-2023 bala ai kyrteng Promises Delivered’ ha ka jingdon lang u National Vice President ka NPP bah Prestone Tynsong, u National Treasurer James K Sangma, ki MP ba kynthup ka Agatha K. Sangma bad u Dr. W.R. Kharlukhi.
Nalor kane ka NPP hynne ka sngi kala pynbna ruh iaki kyrteng jong ki 58 ngut ki kyrtong ki ban iakhun ha kane ka ilekshon ban wan.
Haba pynkynmaw ia u Purno Agitok Sangma (Bam Kwai Dwar U Blei), u heh ka NPP ula ong ba ka NPP kala shakri iaka jylla daka thong mynta la 5 snem bad ka la lah ruh ban shim iaki mat kum ka jingiakren pynbeit pud bad ka Assam bad dei tang ka NPP hi kaba nud ban shim ia kum kine ki mat ban pynbeit.
“Lada don kano kano ka Party kaba nud ban pynbeit ia u pud u sam, ka dei hi ka NPP bad nga kular ha phi ba lada ka NPP ka ioh ban thaw sorkar marwei hadien ka ilekshon, ka sorkar kan iaid shakhmat ban pynbeit noh ia u pud u sam bad ka Assam” la ong u Conrad.
U Conrad ula ong ba ka ilekshon 2023 ka long kaba kongsan namar kadei hadien ka jingdap 51 snem ka jylla Meghalaya bad naka liang ka party ruh ka don iaka thong ban shakri iaki paidbah bad iaka jylla.
Haba buh ka jingkylli sha baroh, ba balei donkam ban thaw sorkar marwei, u Conrad ula ong ba ka jylla ka donkam ban ioh daka sorkar ba marwei bad naka liang ka NPP kan lah ban buh maw nongrim naka bynta ban trei ha ki 50 snem ban pynthikna ban pynurlong iaki mat jingdawa ki paidbah bad ka jylla.
“Kum ki paidbah ka jylla donkam ban shaniah iaka NPP kaba la lah ban pynurlong ia bun ki jingkular ha kine ki 5 snem bad lada ka NPP ka ioh ban thaw sorkar marwei, kan plie lad ban trei naka bynta 50 snem naka bynta ban pynurlong iaki mat jingdawa jong ki khun samla, ki longkmie, ki nongrep bad ki paidbah” ula bynrap.
U Conrad ula pynpaw ba ki paidbah ki ap sa iaka sngi thep Vote namar ki kwah daka sorkar kaba khlain bad ula pynpaw ruh ka jingthikna ba ki paidbah kin ai ka jingkyrshan ba pura iaka NPP naka bynta ban lah ban trei naka bynta ka bha ka miat ki paidbah.
Ula ong ba ka NPP kan pynthikna ba kiwei ki jylla ka thain shathei lam mihngi ki nud nuksa iaka Meghalaya bad mano mano ruh kin nym lah ban peit poh iaka jylla hynrei kin hap nuksa kylla iaki kam ba ka sorkar jylla ka leh naka bynta ki paidbah bad ka jylla.
Kumban shu pynkynmaw ba kumba 10 ngut ki kyrtong ba ka NPP ka pynbna hynne ka sngi kidei ki kyrtong kiba la wan na kiwei ki sengsain pyrthei kynthup naka Congress bad TMC.
