Shillong, Naiwieng 14: Ka KAM Meghalaya ka la pyllait paidbah ia ka jingrwai iakhun elekshon kaba la ai kyrteng “Ka Kam Kan Ialam”.
Kane ka jingrwai ka mih na ka thwei pyrkhat ki paidbah nongshong shnong kiba iakhun bad trei minot man la ka sngi bad ka jingiakhun na ka bynta ka synshar hok ka bishar hok bad ka treikam kaba shai bad ai jingkheiñ.
Kane ka jingrwai ka dei ruh ka ban ai mynsiem ia ki lai ngut ki candidate jong ka KAM ki ban iakhun ha ka elekshon 2023. Kita ki long ka kong Angela Rangad na South Shillong, ka kong Wanpynhun Kharsyntiew na ast Shillong bad u bah Kyrsoibor Pyrtuh na North Shillong konstitwensi.
Ka KAM bad ki candidate jong ka ki ieng ha ka nongrim jong ka hok, ka jingialong mar ryngkat bad ia burom kylliang.
Ia kane ka jingrwai la pyllait paidbah mynta ka sngi da i mei rad Pheril Kharsyntiew iba la kot 92 snem ka rta bad i Kong Emi Rangad iba 80 snem ka rta bad ia kane ka jingrwai la thoh da u bah Kampher Mark Swer.
Ka “Kam” ka dei ka kyntien kaba kit ia ka juh ka jingmut ha ka ktien Khasi, Garo, Hindi, Bengali bad ka dei ka jingrwai kaba mih na ki paidbah bad ka dei ruh na ka bynta ki paidbah nongshong shnong.
Ka KAM ka dei ka rynsan saiñ hima kaba don ki nongrim kiba skhem bad ba shai.
Ka jingrwai ka sdang da ki kyntien dukha mynsiem halor ki jinglong jingman ka Jylla kaba la jan hiar sha ñiamra. Ka jingrwai ka dei ka jingkhot ban pynkhie im biang ia ka Jylla bad ka imlang sahlang.
La pynbit pynbiang ia ka jingrwai da ka kynhun Da Minot bad la rwai da Tipriti Kharbangar. Kumjuh ruh ki volunteer jong ka KAM ki iashim bynta shitrhem.
