Shillong, Jylliew 05: Ka seng Hynñiewtrep Youth Council (HYC) Central Executive Council ka la pynlait paidbah iaka jingrwai ‘Bei Rymaw’, ka ba khot iaki paidbah ban iada iaka mei mariang.
Ka jingpynmih ia kane ka jingrwai ka long ruh kum shi bynta ban rakhe iaka jingdap 10 snem ka seng. Ka jingrwai ka long ha ka sur kum ka jingkyrsiew thiah iaka imlang sahlang ba kan shim laka bynta ban sumar iaka mariang.
Ia kane ka jingrwai la thoh da i nongthoh jingrwai ba paw ka bri Hynniewtrep, i Kong Amabel Susngi, da kaba iarwai lang bad i Kong Bahun Marweiñ. Ka jingrwai bad ka music video ka pyni bad ka kren ruh ia ka jingitynnad ki ranab lum bad ki them ka ri Khasi, kiba ym ju iohi koit ha kiwei pat ki jaka ka pyrthei.
U President ka HYC, Bah Roy Kupar Synrem u la ong, “Haba ngi peit iaka sawdong sawkun jongngi, ngi sakhi ba iaki wahduid la pynjaboh, iaki khlaw la tan bad iaka mei mariang la pyntngit. Kum ka seng ngi dap da ka jingsngewkhia kaba khraw ban kren ia kane ka mat bad ngim lah ban peit sha kiar, hynrei ngi sngew ba ka don ka jingkhot iangi ban iawer ia baroh ban leh eiei ban iada iaka mei mariang. Kane ka jingrwai, namar kata, ka khot iaki para doh para snam ban pynkut noh ia ka jingleh thurmur iaka mariang”
“Ka jingleh beiñ leh khoh iaka mariang ka dei ka ba lah ban wanrah ia bun ki jingmynsaw, kumba ngi lah iohi ha ka jingjulor ba la wanrah da ka erlang thari Remal dang shen. Ka jinghap noh jongka khyndew bad wat ka jingduhnoh iaki mynsiem briew haka jylla jongngi bad ruh ha kiwei pat ki jaka, ki dei kiei kiei kiba ngi dei ban sngewthuh. Lada ngi ailad iaki jingpynjulor, kata hi shisien ka sngi kan kyrtoh kylla bad kan wanrah iaka jingsyier iaka jingim”
Ka jingpynlait paidbah ia kane ka jingrwai ha ka jingiatreilang bad ki kaitor bad ki nongthaw jingrwai, ka dei kum shi bynta ban rakhe iaka jingdap 10 snem jong ka HYC ka ban long haka 17 tarik u Naitung, ka ba dei ruh ka sngi ba la seng iaka. Ka jingkyrmen ka long ba ki briew kin sngap iaki kyntien jong ka jingrwai ba la thoh bad rwai ha ka ktien Pnar bad ktien Khasi Sohra.
Ka Kong Amabel Susngi kum ka nongthoh iaka jingrwai I lah ong, “Ka khubor ka ba don ha kane ka jingrwai ka long beit ban iawer ia baroh ban pyrkhat khia ia kane ka kam ban iada iaka mariang.
Ka jingpyndonkam iaki jingtem tynrai kum ka Duitara, Ka Ksing Shynrang, Ka Padiah bad Ka Bom, ka thew ruh shaphang ka rukom im ka jaitbynriew Hynñiewtrep kaba iajan bha bad burom bha iaka mariang. Ka jingpyrshang jong ka HYC, namar kata, ka long ka ba dei por bha”
Ia kane ka jingrwai la pynbit pynbiang daka kynhun ba pawnam ka jylla, ka Summersalt. Ka kynhun Summersalt ka la thoh shibun tylli ki jingrwai kiba kren iaki mat ki ba ktah iaka imlang sahlang da kaba khot iaka jaitbynriew ban im adkar haka jingkit khlieh.
Ka jingrwai “Bei Rymaw’, ka dei namar kata ka jingiatrei lang hapdeng jong ka kynhun bad kiwei kiwei ki nongrwai ban kren iaka jingshisha bad pynsngew iaka jingdonkam ban iada iaka jingai kaba U Blei u la ai ia ka ri Khasi-Jaintia.
