Shillong, Rymphang 02: Ka Hill State People’s Democratic Party (HSPDP) hynne ka sngi kala pyllait iaka Manifesto naka bynta ka ilekshon MLA 2023 bad ha kane ka Manifesto ka Party kala kular ban shim ia ki lad lynti ban iada iaka jinglong tynrai u trai muluk ka Meghalaya.
Ha kane ka Manifesto ka Party ka kular ruh ban shim khia haba iadei bad ki lad jingiada iaka jinglong trai ka khyndew ka shyiap.
Haba kren ha kane ka jingialang u president ka HSPDP u bah K.P Pangniang ula ong ba ia kane ka Manifesto la shna ha kata rukom ba lada ka Party ka wan ha ka bor hadien ka ielkshon, yn thaw sorkar kaba khuid ba suba kaba myntoi naka bynta baroh ki paidbah ka jylla.
U bah Pangniang ula ong ba naka liang ka Party ka iai ban dawa jylla laka jong kata ka Khasi-Jaintia, ka jingpyrshah tih Uranium, ka jingdawa ban pyntreikam Inner Line Permit (ILP) bad kumjuh ruh ban pyrshah iaki lynti Rel hapoh ka jylla.
Ula bynrap ba lada ka HSPDP ka ioh lad ban wan haka bor, kan plie ki lad ban kyntiew iaka ioh kam ioh jam ki samla bad kumjuh ruh ban pynshlur ruh iaki khun samla ban ieng hala ki jong ki kjat naka bynta ban kyntiew iaka ioh ka kot hala ki dong ki thain bad ka jylla baroh kawei.
Ha kane ka sngi ka HSPDP ka seng riewlum barim tam hapoh ka jylla, kala pynbna 11 ngut ki kyrtong ki ban iakhun ha kane ka ilekshon 2023.
