Shillong, Risaw 26 : Ka Central Pollution Control Board, ha ka sngi Balang kala pyllait ia ka kaiphod kaba pyni ia ka jingjaboh ka lyer ha kylleng ki jaka sor ka Ri bad hangne ka Byrnihat, Meghalaya ruh kala paw ba ka dei kaba jaboh tam hapoh ka Ri India.
Kat kum ka Air Quality Index (AQI) bala pyllait da ka Central Pollution Control Board, ka Byrnihat kala kynjoh ia ka AQI ba kot 302, kaba pyni ba ka dei kaba jaboh tam na ki jaka sor hapoh ka Ri.
Ka kaiphod ka pyni ruh ba ki Nongbah kum ka Delhi bad ka Mumbai, ki dei kiba jaboh bha ha ka lyer, kaba buh ha ka jingma ia ka koit ka khiah ki paidbah.
Hadien ka Byrnihat, kiwei pat kiba bud ki dei ka Hanumangarh (297), Greater Noida (278), Faridabad (270), Manesar (251), Bahadurgarh (247), Delhi (243), Meerut (240), Ballabgarh (234) bad kiwei kiwei.
Kat kum ka CPSB, ka thup ‘biang’ (good) ha ka Air Quality Index (AQI) ka shong hapdeng 0-50, ‘ba shu biang’ ka long hapdeng 51-100, ba hapdeng ka long hapdeng 101-200, ba duna (poor) ka long hapdeng 201-300 bad kaba duna shaba palat (very poor) ka long hapdeng 301-400 bad bala palat eh ka long hapdeng 401-500.
