Pyllait ka ADB ia ka video ba shimkhia ka Meghalaya ia ka koit ka khiah ki Khunlung bad Longkmie

Shillong, Nailar 22 : Ka Asian Development Bank (ADB) kala pyllait ia ka video ba thymmai kaba pyni ia ka prokram jong ka Meghalaya ban pynkhlain ia ka jingroi jingsan ki khunlung khynnah bad ka jingkoit jingkhiah ha ka bor pyrkhat jong ki Longkmie, kaba la sdang ha u snem 2023 da ka jingkyrshan ka ADB bad ka Sorkar Japan.

Ka jingthmu ka phaikhmat eh halor ki 1000 sngi ba nyngkong jong ka jingim, kaba la niew kum ka por ba kongsan bha na ka bynta ka heh ka sain ki khunlung.

Kat kum ka video, ka Meghalaya-watla ka don jan kumba 6000 tylli ki Anganwadi Centre-ka dang donkam sa kumba 1000 tylli ban pynpoi ia ka jingshakri sha ki shnong kiba jynjar ban poi kiba don sha ki jaka riat. Kane ka prokrama ka dei kaba la pynwan dur ban pyndap ia kane ka jingduna haba kyntiew kyrdan ruh ia ki jakasumar khunlung kiba lah ban kyrda ia ka jinglong ka suinbneng bad ki jingbam ba tei met.

Katba ka prokam ka nang iaid, ka Meghalaya kala pynkhreh ban ai shuh shuh sa ia ki jingbam tei met ia baroh ki longkmie ba armet, ki longkmie ba ai buin khun, bad ki khynnah kiba naduh 6 bnai haduh 6 snem.

Kan ai jinghikai ruh ia kiba bun ki nonghikai ki ban pynleit jingmut halor ka jingialong ryngkat kyrdan ki kynthei bad shynrang bad ka jingkdup lang ha ka imlang sahlang, haba pyniar ia ka jingshakri halor ka koit ka khiah ka bor pyrkhat pyrdain lyngba ka jingleit jngoh bad leit iasyllok.

Ka ADB ka la ong ba ka prokram ka pyni ïa ka jingkylla na ka jingai jingshakri ba kongsan sha ka rukom treikam kaba pura kaba pynïasoh lang ïa ka koit ka khiah, ka jingbam, ka jingnang jingstad, bad ka jingkoit jingkhiah ha ka bor pyrkhat, kaba weng ïa ki jingeh kiba dang ïai bteng kum ka jingïap jong ki longkmie por kha khun, ka jingsngewsih hadien ba la kha khun, ka jingduna snam ha ki khunlung bad kiwei kiwei.

Ka jingïatreilang hapdeng ka ADB, Japan, bad ka Sorkar Meghalaya, la kdew ha ka video, la khmih lynti ba kan ai ïa iwei pa iwei I khynnah ha ka jylla ïa ka jingsdang ka jingim ha ka met ba koit ba khiah bad ba ioh marbiang ia kiei kiei baroh.