Imphal, Nailur 22 : Hadien ka jingiakhih kaba jur ha kine ki 6 sngi kiba la leit da ki kynhun sengbhalang bapher bapher, ka Iingkashari NIA, Imphal, hynne ka sngi thohdieng kala ai jamin noh ia baroh 5 ngut ki samla kiba la shah kem ha ka 16 tarik u Nailur ryngkat bad ki tiar ia siat.
La iathuh ba watla ka NIA court kala ai Jamin, kitei ki 5 ngut kim shym la lait pat na phatok haduh hynne ka janmiet.
Ki 5 ngut ki samla kila ioh jamin hadien ba kila siew iaka PR bond kaba T.50,000, bad ka Iingkashari kala buh 5 tylli ki kyndon kaba kynthup ba kim dei ban mih Manipur khlem da ioh jingbit shwa na ka Iingkashari.
Ka Iingkashari kala bthah ruh ba kidei ban iatreilang bad ka kynhun tohkit bad ba kidei ban leit mih haba ki shah khot ha ka kynhun tohkit, kim dei ban pynjulor ia ki sakhi satar bad ba kin leit hajir ha ki ophisar kiba tohkit man la ka 15 sngi.
Ka Iingkashari kala hukum ruh ia u ophisar uba tohkit ne Investigating Officer ba ym dei ban pynibor than ia kitei ki samla ba kila leh ia kam pyntriem.
Ka Iingkashari kala ong ba u IO jong kane ka case um shym la lah ban ai ia ki sakhi kiba khlain pyrshah ia kine ki briew ba kila leh ia ki kam lehnoh bad kam pynkhein ain pyrshah ia ka Sorkar kaba khring ia ka kyndon 16 jong ka UA(P) Act bad kyndon 121-A jong ka IPC.
Haba kyntait ia ka jingkyrpad ki pulit ka Manipur ban buh ia kitei hapoh ka judicial custody, ka Iingkashari kala ong baroh kitei ki samla kim pat leh ia kano kano ka kam ba buh jingma ne kynshoit pyrshah ia ka Jylla tad haduh ka por ba ki shah kem”.
Ki ophisar kham hashwa, kila pynpaw ba ki pulit Manipur kila kem ia kitei ki 5 ngut ha ka sngi Saitjain ha ryngkat ki tiar siat bad ki uniphom.
Bun ngut ki paidbah kiba kynthup ia ki shynrang bad kynthei kila ia mih ha ka sngi u Blei ban pyrshah jur ia ka jingkem ia kitei ki samla bad kila pyrshang ban leit tur sha Porompat Police Station ha Imphal East District ban dawa ban pyllait noh ia kiba shah kem, hynrei ki pulit kila siat da ki tear gas.
