Shillong, Lber 31: Ki Pulit ka North Garo Hills haka miet 30 tarik mynta u bnai, kila ioh ban pyllait im ia uwei u nongbylla sngi uba shah rahbor ha ka kynhun ki runar.
Ia une u nongbylla ba shah rahbor la tip kum u Leeku G Momin 26 snem ka rta bad la rahbor ia u katba u dang ioh thiah ha ka ing ha Nokpante ha kaba kumba 7-8 ngut ki runnar kila rung bad rahbor ia u.
Haba ioh jingtip ia kane ka jingjia, ki Pulit ka North Garo Hills haka jingiatreilang bad ki CRPF jong ka 120 Bn kila pynlong ia ka jingkhynra haki katto katne jaka.
Ki Pulit kila lah ban tip iaka jaka ba u shah rahbor bad kila ioh pyllait ia u na kawei ka khlaw kaba don ha ka shnong A’brong.
“Ka jingthwet ban lap iaki ba donkti ba rahbor ka dang iaid shaid shaid bad ym lah ban kyntait ba ka lah ban don ka jing iashun hapdeng u lanot bad kiba rahbor. Ka jingtohkit ka dang iaid” la ong u Bruno A Sangma u superintendent of police ka North Garo Hills.
