Agartala, Nohprah 19 :Da kaba kam ba ka prokram jong u Myntri Rangbahduh (PM) Narendra Modi ha Agartala ka long kaba pulom, na ka liang u Myntri sorkar barim uba dei ruh u MLA ka Congress u Sudip Roy Barman ula ong ba na ka liang ka sorkar kala pynlut haduh T.20 klur na ka pla tyngka ka jylla na ka bynta kane ka jingialang.
Nalor kata ula kynnoh ruh ia ki nongialam ka BJP kila pynbor bad byrthen ia ki paidbah ba ki dei ban wan sha ka rally kaba la long hynnin ka sngi ha Swami Vivekananda Maidan.
“U PM Modi ula wanrah ka jingbynniaw hapdeng ki paidbah ka Tripura da kaba khlem pynbna satia ia kino kino ki skhim ne ki projek kam pynroi, khamtam ha kaba iadei bad ki samla.Ngi sngewkhia jur ba la pynlut haduh 20 klur na ka pla tyngka ka sorkar jylla kaba dei ka pisa jong u paidbah hynrei kam shym la don kano kano ka jingpyllait ia ki skhim kam pynroi na ka bynta ki nongshong shnong ka jylla,” ong utei u MLA ka seng Congress.
“Ka sorkar synshar BJP kala pynbor bad byrthen ia ki paidbah ba ki dei ban wan iashim bynta ha kane ka jingialang jong u PM Modi,” ong u Barman ha ka jingialang bad ki lad pathai khubor hynnin ka sngi U Blei.
U Roy Barman ula kam ba ki projek kiba u PM Modi ula plie hynnin ka sngi ka kynthup ha kaba iadei bad ki surok highway, ka lynti rel kaba pyniasoh ia ka Agartala-Akhaura, ka kad liengsuin MBB Airport bad kiwei pat ia kiba la mang da ka sorkar UPA.
“Ka BJP ka tip tang ia ka politik jong ka jingpyniapait iapra.U la dei ban pyrkhat balei ka thain shatei lammihngi (Northeast) kala wan shadien ha kaba iadei bad ki kam aijingiarap pisa.Tang na ka bynta ban pynneh ia ka kyrteng jong u PM Modi ha kawei pa kawei ka projek kam pynroi kila weng noh ia ka Planning Commission bad wanrah da ka NITI Ayog”, kam shuh shuh utei u heh Congress.
Shuh shuh u Barman ula ong ba ka BJP kala byrthen ia ki paidbah da kaba ong ba ia ka jingiarap kaba iadei bad ka jingpynshna ia ki iing baduk lyngba ka skhim PMAY kin ym lah ban ioh, kin ym ioh ruh ia ka jingpyntrei lyngba ka skhim MNREGA lada kim wan iashim bynta sha kane ka rally jong u PM Modi.
Nalor kata ula ong ruh ba u PM ula leit jngoh ia ka jylla Meghalaya bad um shym la patiaw ban kren halor ka jingma ba shyrkhei na u drok kaba long ka jingeh kaba khraw ia ka thain Northeast hi baroh kawei.
“Ula dei ban sngew lehrain ba ka sorkar jong u ha Tripura ka la pulom ban pynurlong ia ki jingkular kiba kila khlei.Ha kine ki sngi ki ban wan ki paidbah kin pyni da ka red card ia ka BJP.Ki paidbah kila kyntait ban iashim bynta ha ka rally jong u PM namar ki la sngewthuh ba baroh ki dei tang ki kam thok kam shukor.Ka prokram jong u PM kala long kaba pulom bad ki paidbah kila kyntait ban wan iashim bynta,” ong u Sudip.
Ha katei ka jingialang bad ki lad pathai khubor la ia don lang ruh u MLA barim uba dei ruh u nongialam ba la rim jong ka party u Asish Kumar Saha, bad u nongaiktien ka party u Prasanta Bhattacharya.
