Shillong Nailar 03: Ka All Meghalaya SSA Non Teaching Staffs Association (AMSSANTSA) ha ka sngi Thohdieng kala pynpaw ia ka jingbym hun halor u soh ba mih na ka jingialang jong ka Rationalization Committee ban eksamin ia ka jingtyrwa ban pynkiew bad pynbeit ia ka tulop jong baroh ki nongtrei Samagra Shiksha (Non-Academic) bad kila shim ia ka rai ban bteng ia ka jingiakhih kaba khlem kut por, tad haduh ba ka sorkar kan kloi ban mynjur ban pynkiew tulop da 80%.
“Ngim sngewhun ia ka jingmih jong ka jingialang mynta ka sngi. Ka jingiakren kam shym la poi shano shano ruh, kam shym la kynthup wat ia ki kyndon treikam, kumta kala long tang ka jingpynlut kai ia ka por”, la ong ka President ka AMSSANTSA ka Kong Jennyfer J Synrem haba iakren bad ki nongthoh khubor hadien ba la wai ka jingialang.
“Kumta, ngi la rai ban bteng ïa ka jingïakhih da kaba shong kyllain mungor kaba khlem buh por tad haduh ban da urlong ki jingdawa jong ngi,” kala ong haba pyntip ba ka jingïalang kaba ar jong ka komiti kan long ha ka sngi Palei jong ka taiew ban wan.
Ka jingpynbna paidbah ha kaba ïadei bad ka komiti kaba don 20 ngut ki dkhot, kaba la khlieh da u Commissioner & Secretary u Vijay Kumar Mantri – la aiti da u Myntri Rangbah ka Jylla Conrad K Sangma sha ka kynhun jongka All Meghalaya SSA Non Teaching Staffs Association (AMSSANTSA) hadien ka jingïalang kaba la long ha ophis treikam jong u Myntri Rangbah, ha ka sngi Palei.
Kila don palat 1200 ngut ki nongtrei bym dei ki nonghikai hapoh ka SSA kiba la pynlong ïa ka jingïakhih shong kyllain mungor khlem por ha madan Malki hadien ba kila kyntait ïa ka rai jong ka sorkar jylla ban pynkiew ïa ka tulop jong ki kaba 25%. Ki nongtrei kiba pynlong ia ka jingiakhih kila dawa ban pynkiew tulop da 80% ryngkat bad 2% katkum ka jingtrei slem ha ka kan bad ban pynkiew 5% man la u snem.
“Ka nongrim kaba ngi ïeng, ka long lada ki pynslem shuh shuh, ngin ym weng noh ïa ka jingïakhih jong ngi. Kumta ka sorkar ka dei ban shim rai mardor khnang ba ngin lah ban leit phai noh sha la iing. Ngi pynpaw shai ba ngim sngewtynnad ban pynlong ia ka jingiakhih kumne,” la ong ka President.
Haba batai halor ki 7 tylli ki Term of Reference (ToR), ka jingpynbna paidbah ba la pynmih da ka tnad pule puthi kala ong, ba la pynkhamti ha ka komiti ia ka jingkitkhlieh ban bishar bniah ia baroh ki jingtyrwa kiba la iohpdiang haduh mynta kiba iadei bad ka jingpynkiew ia ka tulop jong baroh ki nongtrei ki bym dei ki nonghikai jong ka SSA.
Kala ong, ba ka komiti kan pule bniah ia ki rukom siew ha ka imlang sahlang ha ka jylla Meghalaya bad kan buh ruh ia ka jingkdew ia ki rukom siew ba la bud ha kiwei pat ki jaka pule bad nalor kane, ka komiti kan pule bad ai jingmut ia ki sienjam ban pynduh ia baroh ki jingbym iahap ha ki jingsiew ha ki kyrdan bapher ha kylleng ki District bad ki Block.
“Ka komiti kan bishar ruh ïa ki jingtyrwa kaba la ïoh ha kaba ïadei bad ka jingpynkiew man la u snem ïa kum kine ki nongtrei. Ka komiti kan pyrkhat ha kaba iadei bad ka jingtrei slem ia ka kam ban pynbeit ia ka tulop jongki. Ka komiti kan ai ruh ia ki jingai jingmut bad ki jingbthah kiba iadei bad ka jingpynbeit ryntih ia ki kam ha ki kyrdan bapher bapher. Ka komiti kan pynthikna ba ïa ki kyndon bad ki jingbthah ba la pynmih da ka tnad pla tyngka na ka por sha ka por dei ban bud ryntih” la bynrap ha ka jingpynbna paidbah.
 ha ka sngi Thohdieng kala pynpaw ia ka jingbym hun halor u soh ba mih na ka jingialang jong ka Rationalization Committee ban eksamin ia ka jingtyrwa ban pynkiew bad pynbeit ia ka tulop jong baroh ki nongtrei Samagra Shiksha (Non-Academic) bad kila shim ia ka rai ban bteng ia ka jingiakhih kaba khlem kut por, tad haduh ba ka sorkar kan kloi ban mynjur ban pynkiew tulop da 80%.){kind=link}