Guwahati, Iaiong 05: Na ka liang u Chief Wildlife Warden (CWLW) ka Assam u la pulom ban ai ia ka kaiphot kaba bniah ha kaba iadei bad ka jingdon jong ki rhino shi reng (one-horn rhino) hapoh Kaziranga National Park (KNP) sha ka tnat Union Ministry of Environment, Forest and Climate Change.
Kane ka la wan long hadien ba u nongtrei halor ki kam pynneh pynsah mariang ka Assam u Rohit Choudhury u la kynnoh ba ka la don ka jingleh sting ha kaba iadei bad ka jinglum jingkhein ha kaba iadei bad ka jingdon jong ki rhino hapoh kane ka park.
Ha ka 19 tarik u Rymphang ba la dep, katei ka tnat ka la pan ia ka kaipho na ka CWLW, hynrei na ka liang u Choudhury u la kam ba ka bynta jong ka tnat wildlife ka tnat forest ka Assam kam shym la shimkhia ha kaba iadei bad katei ka hukum ba la pynmih da ka sorkar pdeng.U Choudhury u la ong ruh ba ia ka jingdon jong ki rhino hapoh Kaziranga National Park ha u 2022 la shu khein antad lyngba ki survey data sheets khlem kano kano ka jingpynthikna.
Katkum u Choudhury, la ong ba ia kine ki data sheets na baroh ki 84 tylli ki compartment jong ka National park ka pyni ba ka jingdon jong kine ki rhino ka long 2,042. Hynrei, ia kane ka jingdon jong kine ki rhino la shu shim antad hadien ka sample survey ha ki katto kane ki jaka ba la jied ban pyni 2,613 ki rhino kata kaba la roi sha ka 200 na ki 2,413 tylli ba la ioh jingkhein ha u snem 2018.
Shuh shuh u Choudhury u la kam ba kaei ka jingioh lum jingkhein lyngba ka survey ka long ban ialam bakla ia ka sorkar abd ia ki paidbah ha kaba iadei bad ka jingdon jong ki rhino hapoh kane ka national park.
Ka Kaziranga National Park ka la kylla pawnam bha namar ka jingdon ia ki rhino shi reng kiba kham pher bad kiba kham bun kyrhai.
