Shillong, Risaw 07: Ka Sorkar Jylla kala pynbna ia ka thup kyrteng jong ki samla pule kiba la ioh ia ki 93 tylli ki seat ban leit pule MBBS hapoh ka central pool quota jong ka samoi pule 2025-26.
Ia kane ka thup la pynmih hadien ka jingpynbeiit ia ki jingdawa bala pynsngew da ka Khasi Students’ Union (KSU) ba iadei bad ka jingjied bym hok ia ki samla pule ban leit pule na ka bhah ka Jylla.
Na kine ki 93 tylli ki seat, 14 ngut ki samla pule la ai hapoh ka thup unreserved, 37 ngut na ka thup ki Khasi-Jaintia, 37 na ka thup ki Garo, bad 5 na ka OST/SC. Nalor kane, 35 ngut ki samla pule la buh ha ka waiting list.
Kat kum ka hukum ba pynmih da ka Joint Secretary ka Tnad ka Koit ka Khiah Dr Rezina Ch Marak ha ka sngi Ba-ar, ia kane ka thup la pynmih hadien ka jingbujli ia ki kyrteng bad ka jingiaid kat kum ka rai jong ka jingialang ba long ha ka 6 tarik Risaw.
Lah ban kdew, kawei ka samla pule, Tanushka Chakraborty, kaba la ioh nyngkong ia ka seat ha ka thup unreserved, la rah noh ia ka sha ka thup ki waiting list hadien ka jingbishar bniah.
Ha ka 3 tarik Risaw, ka Sorkar Jylla kala pynsangeh ban pdiang ia ka kyrteng bala jied ban leit pule MBBS hapoh ka Central Pool quota hadien ka jingpyrshah jong ka KSU.
Ka KSU ha ka jingialang bad u Myntri ka Koit ka Khiah Bah Wailadmiki Shylla ha ka sngi Nyngkong, kala kdew ba kane ka jingjied ia ki samla pule ka dei kabym shai satia bad ka bym iaid kat kum ka jingioh marks, ha kaba ka samla pule kaba ioh duna marks kala ioh rung ha ka thup unreserved katba ki samla pule Khasi ba ioh bun marks kila shah kyntait.
Ka KSU kala dawa ban weng noh ia ka clause 9.6 na ka Standard Operating Procedure (SOP) kaba donkam ia ki samla ba kin jied hapdeng ka thup unreserved (Open) bad ka thup ki Scheduled Tribe (ST).
Ha kajuh ka por, la bthah ia ki samla pule ba shah jied ba kin leit aiktien sha ka Tnad Health & Family Welfare, Room No 502, Additional Building ka Meghalaya Secretariat ha ka 7,8 bad 9 tarik Risaw hashuwa ka por 5 baje janmiet ban pdiang ia ka course bad iasoi ia ka bond. Ki samla pule kin hap ban rah ia 4 tylli ki dur passport size bad ki aadhaar card.
