Shillong, Rymphang 04 : Arngut ki runar kila prong tuh hapoh ka Ophis jong ka Khasi Hills Autonomous District Council (KHADC) ha ka 2 tarik Rymphang bad leit kyndang ia ki kamra treikam jong ka Tnad Revenue, Budget bad Finance.
Kane ka jingjia kala jia ha ka por kumba 6 baje mynstep bad la shem ia kane ka kam da ki nongtrei, kiba poi ophis ha ka por 11 baje mynstep.
Kila lap ba ki kot ki sla kila saphriang lut ha madan bad ka dap ba pyrshang ban kyndang ia ki duli.
“Lyngba ki video CCTV, lah iohi ba don arngut ki briew kiba rung hapoh ka Ophis ha ka por 6 baje mynstep, kila kiew ia ki duli bad bret lut ia baroh ki file sha madan” ong u EM ka KHADC Bah Denzil Raynard Chen.
Ka KHADC kala mudui ia ka ejahar ha Lumdiengjri Police Station bad ka jingtohkit mynta kala iaid shakhmat.
“Ki Pulit kila sdang ia ka jingtohkit ban iohkem ia ki runar ba donkti” ula bynrap.
