Shillong, Lber 05 : U Myntri Rangbah ka Jylla Conrad K Sangma ha ka sngi Balang ula pyntip ba ka Sorkar Jylla kan sa khot shen ia ka jingialang bad baroh ki seng sain pyrthei bad ki kynhun bapher bapher ban iakren halor ka jingpyntrei ia ka lynti rel bad ban ki jingsngewkhia halor ka kam rung kyrthep ki bar jylla sha Jylla.
Haba jubab ia ka mat iatai ba lyngkot halor kane ka kam ha Iingdorbar, u Conrad ula ong “Kum ka Sorkar, haba buh ha ka jingmut jingpyrkhat ia ka jingsngew u paidbah, ngi la kren shai bha ba ngin pyniaid shakhmat ia kine ki project tad hadien ka jingiasyllok bad ki kynhun bapher bapher bad ioh ia ka jingmynjur lang jong baroh”.
Haba pdiang ia ka jingai jingmut u Nongialam ka Liang Pyrshah kum ka lynti kaba dei ban jam shakhmat, u Conrad ula ong “Ngin sa khot ia katto katne ki jingialang bad ki seng sain pyrthei lem bad ki kynhun bapher bapher ban iakren ia kane ka kam. Ai ban gin buh ia kiei kiei baroh halor ka miej, iathir iatar ia kane ka kam bad ngin iapeit la ka don ne em ka lynti ban jam shakhmat haba iadei bad ka jingpyniasoh lynti rel”.
“Kane ka long namar ha kiba bun ki khep haba ngi iakren, ngi pynkut ia ka jingiakren da kaba pynshong nongrim ia kaei kaba long ba man mynta (position) hynrei ka jingiakren ruh ka dei ban long kat kum ki mat (ishu). Lada ka mat ka dei ka lynti rel ka mut ba ka dei ka kam ba mynta (position) hynrei ka mat ka dei ka jingrung mynder, kumta, ka dei satang da wanrah lang ia baroh ki briew ha ka jaka ban iakren ia ka kam ba mynta, ngi iakren ia kaei ka ishu bad ngin shim ia ka rai” ula ban jur.
U Myntri Rangbah ula pyntip ruh ba ka Sorkar India kala wanrah ia ka jingtyrwa ban pyniasoh lynti rel sha man ki kyndong kynshrot bad hajan baroh ki Nongbah ki Jylla bad bynrap “Ngi lah ban long tang ma ngi kaba la shah ieh khlem ka jingpyniasoh lynti rel bad lehse lada ngi duh ha kane ka kynti, ngam tip shuh lano kane ka kabu kan wan biang”.
“Kumta ka long kaba kongsan ba ngin sngewthuh ia ka jingkhia jong ka kam.Lada ngi khmih ia ki jing sngewkhia ba dei hok halor ka jingrng ki mynder, ngi lah ban wad ia ka lynti shakhmat ban leheiei ia baroh ki jingdonkam bad ban nym duh ia kane ka kam ka ban wanrah jingkylla ia ki briew jong ngi khamtam ki nongrep bad ki nongsengkam” ula bynrap.
U Myntri Rangbah ula pyntip ba ha ka jingiakynduh jong u ia u Myntri ka Sorkar Pdeng ban iakren halor ka jingbym lah jong ka Sorkar ban pyniaid shakhmat ia ka Byrnihat railway project, ula pynpaw ba u lah ban wad ia ki lad ki lynti bad ban lap ia ka da kaba iakren ia ki nongshongshnong.
