Shillong Naiwieng 01: U Symbud Myntri Rangbah ka jylla Bah Prestone Tynsong hynne ka sngi Balang, ula ong ba lada ieid hok ia ka jaidbynriew dei ban iakhun da ka elekshon MDC ym ia ka elekshon MLA.
U Bah Prestone Tynsong ula kren ia katei ha ka lyngkhuh sngi ìap kaba 64 jong u Kpa ka Sixth Schedule u Rev JJM Nichols Roy, kaba la pynlong da ka Rev JJM Nichols Roy Memorial Committee, ka JJM Nichols Roy College bad ka Khasi Hills Autonomous District Council.
“Ha nga hi, nga pynshlur ban ym long MLA hynrei ban long MDC, bha ba long MDC ban ia kaba long MLA bad lada ieid hok ia ka jaidbynriew kata kaba donkam. Dang khyndiat tylli ki snem ngi la mynjur iaka Land Bill kaba la pynkupbor da ka riti synshar jong ka ri India, 50 snem duna ngim don ia ka Land Bill. Kam dei ka sorkar kaba long trai iaka khyndew ka shyiap, hynrei dei ka District Council kaba ri sumar ia ki jaka ki puta katkum ba la pynkupbor da ka Sixth Schedule” ong u Bah Prestone haba bynrap ba donkam ban pynkhlain shuh shuh ia ka District Council.
Haba kynthoh ia ka Resolution bala wanrah da u MLA ka Nongkrem Bah Ardent Basaiawmoit ha ki snem bala leit noh ban pyntreikam noh ia ka Article 371 ha ka Jylla, u Bah Prestone ula ong “Uwei u MLA ula wanrah ia ka mat ne Motion ha ka ìingdorbar thawaiñ ka jylla ba dei ban pynduh noh iaka District Council bad ha ka jaka jong ka DistrictCouncil dei ban pyntreikam noh na ka Article 371. Kane ka dei kaba ma bha, hynrei ha kaba khatduh ngi la kyntait ia katei ka motion, ngam kwah ban batai eiei shaphang une u MLA hynrei sa wad jingtip hi ma phi, lada phim lap, leit hangtei ha Assembly Secretariat phin ioh ia kato ka bui kumba ka long”.
Haba pynksan ia ka jingdon ki District Council, u Bah Prestone ula ong, ba ki paidbah ka jylla kila khihwin ha ka por ban pynkylla aiñ noh iaka Citizenship Amendment Bill (CAB) sha ka Citizenship Amendment Act (CAA) hynrei namar ba ka Meghalaya ka don ia ka Sixth Schedule ka Sorkar Pdeng kala rai ban ym pyntreikam shuh ia ka CAA ha ki jaka jong ka Sixth Schedule jong ka Meghalaya bad ki jaka ki bym hap ka Sixth Schedule ki don tang 3% ha ka jylla Meghalaya.
“Ki don ki rangbah kiba ong ba ka jaidbynriew ka don ha tmier ka riat bad sa tang lano kala hap sha riat, nga ong hangno kata ka riat, ka riat aiu kata, katba dang don ka District Council ngin iai neh, lada wan ka 371 kata kein kadei ha tmier jong ka riat bad ngi lah ruh ban duh noh” ong u Bah Prestone.
Ula ong, ba ki paidbah kila duh jingshaniah ia ka District Council namar ba ki don ki MDC kiba lapmiet ban phet seng namar bym don ka aiñ kaban tehlakam ia ki, kumta la don ka jingiakren ban pynkylla thymmai noh ia ki kyndon jongki District Council bad ka Parliament kan sa wanrah iaka jingpynkylla ia ka Sixth Schedule bad kane kan nang pynskhem bad pynjanai ia ki District Council.
Ula ong, ba ym dei ban dei tang ki jaidbynriew jong ka jylla kiban kynmaw burom ia u Rev JJM Nichols Roy hynrei baroh ki riewlum baroh kiba don ha ri India kidei ban pyndonburom kyrpang ia u Rev JJM Nichols Roy uba la thaw iaka Sixth Schedule ha ka riti synshar ka ri.
U CEM ka KHADC u Bah Pyniaid Sing Syiem haba kren kum u Symbud Kongsan ula ong, naduh u snem 1952 u Rev JJM Nichols Roy ula ai ka jingiathuh bad ka jingiada ia ki riewlum ha ka thain shatei lam mihngi bad dei na ka jingtrei shitom jong une u radbah ba la ioh ia ki District Council ha kane ka ri bad ka Meghalaya mynta ka don 3 tylli ki District Council.
“Une u rangbah ula dep ia ka kamram ban ai iaka Sixth Schedule hynrei ka shong pat ha ngi kumno ngi pyntyllun ia ka kam bad kumno ban pynsngewthuh ia ki paidbah shaphang ka jingkongsan jong ka District Council” ong u Bah Syiem.
Ula ong, ba ka kynhun na ka jylla Ladakh kala wan ban iakynduh ia ka Executive Committee ban sngewthuh shai shaphang ka District Council ha ki snem ba la dep bad kaba sngewtynnad ka long ba mynta ka Ladakh kala ioh iaka District Council bad dang shen kala dep ban pynlong iaka elekshon hynrei kaba sngewbynniaw pat ka long ba ki katto katne kiba na kane ka jylla pat ki kwah ban pynduh pyndam noh ia ki District Council.
Ha kane ka sngi u Kongsan bad u Symbud Kongsan kila sam ia ki khusnam sha ki nongjop ha ki jingiakob ki bapher bapher.
Ha kane ka jingialang la wan ban iashimbynta da u Nongialam ka Liang Pyrshah ha ka iingdorbar thawaiñ ka jylla u Bah RV Lyngdoh, u Chairman ka KHADC u Bah lamphrang Blah, ki MDC ka KHADC, u Principal jongka Rev JJM Nichols Roy College u Rev Dr R.G.M. Sohkhia, ki nongialam Balang jongka Church of God, ki nonghikai, ki khynnah pule bad kiwei kiwei.
